唔郁等升 Vs 急放怕蝕
林盛斌（Bob）：「依家手頭上淨係得番匯豐控股（0005）未放，其他已經走晒。我分別喺70、80、90蚊時都有買過，大約買咗20萬左右。周一開市無論升跌，都唔會郁，當係長遠投資。趁低吸納就唔會啦，之前蝕過一次好甘，冇咗成廿萬。依家有錢都儲起，遲吓再買磚頭保值。」
琦琦：「手頭上有20幾隻股票，有港交所（0388）、阿里影業（1060）、阿里健康（0241）、中國銀行（3988）、工商銀行（1398）等。之前個市升，我隻港交所賺咗6位數，阿里健康就賺過百萬。（擔心今日個市大跌？）唔理啦，因為我喺泰國度緊假，不過我離港前已同經紀講咗止蝕位。除非恒指急跌一千點，我先會有少少擔心。」
衛詩雅：「之前聽朋友貼士，以五位數買入一隻港股，之前股市大升係有賺，之後股市開始跌，我又唔記得放喎，好在即使跌我嗰隻都仲叫有賺。我信『丁蟹效應』o架，諗住今日開市，無論升跌都放晒佢。如果蝕過20%先揸住再睇定啲，趁低吸納就唔會啦。」
薛家燕：「我手持港交所（0388）同中國交通建設（1800）。本身喺港交所220蚊嗰陣買入，後來跌咗就分別喺130同140蚊再買，最近升得勁所以上周五叫經紀290幾蚊就放咗130蚊買嗰啲。不過我12個幾放咗10萬股中交建後佢再升，就賺少咗30幾萬。（上周就放怕「丁蟹效應」？）賺多就唔好賺咁盡。」