阿Sa妓藝超群 大熱爭影后

蔡卓妍(阿Sa)被同業一致看好,大有機會榮升本屆金像影后,但當事人卻從容面對未感壓力。視拍戲為終身職業的她信心滿滿表示:「留得喺度,相信總有一日能夠踏上呢個頒獎台嘅。」雖然今次帶給她各方面前所未有的肯定,但其實拍攝過程中,她遇上「人生最痛」!

阿Sa於英皇電影《雛妓》的表現成功擺脫偶像包袱,爆粗露骨對白更令人刮目相看,電影早前於「大阪亞洲電影節」中為她先拔頭籌帶來殊榮。不停收到各方同業電話及短訊支持的她相當感恩:「今次係喜出望外,去到呢個階段我平常心,覺得今次攞唔到都總有機會嘅,做落去點都會有個『終身成就獎』啩。」

愛犬離世 死頂拍戲

阿Sa覺得戲中自己的所謂「露骨」,說穿了仍是擔心遭人恥笑。她謂:「可能對『蔡卓妍』嚟講係好激,不過同其他類似角色比較,小巫見大巫啦。」拍攝途中,她所面對及付出的卻非筆墨能形容。阿Sa稱:「要keep住角色沉重嘅情緒,成件事好抑壓,Mani(經理人霍汶希)問過我需唔需要去睇醫生,咁啱呢個時候我隻狗仔離世,搞到我抖唔到氣。永遠記得嗰日係去年嘅三月十九日,當時導演問我需唔需要放假,我選擇休息半日就返去開工。」

問阿Sa覺得其他幾位準影后勝算較高?她笑說:「我有睇晒啲戲,其實入圍嘅全部都好好,五個角色都不同類型,真係好難去作出比較。今次好睇評委嘅口味,攞唔到獎亦並唔代表係差嘅。」但最終在記者「逼供」下,她才吐出「趙薇」兩字,絕對是魚與熊掌很難取捨。

多作嘗試 堅拒露點

永不言休的阿Sa希望未來日子,在影圈能作出多方面嘗試,但堅拒三點畢露。她強調過不了自己的心理關口:「坦白講,呢套戲幾年前搵我,我未必會接,依家就冇問題。作為演員,唔同年紀有唔同嘅變化,三十幾歲同六十幾歲都可幾拍戲,唔同階段做唔同嘅事啫。」據知,不少牌品「送上門」爭相贊助阿Sa金像獎當晚服飾,她至今仍拿不定主意,且看當晚「花落誰家」。

髮型:Jacky Tsui@HairCulture

化妝:Natalie Soo@Ndnco.co

場地:英皇娛樂演藝創意學院

文:影視組

攝:劉智源