丁蟹又嚟喇!股民腳震震

近期香港股市熾熱,網民紛紛懷緬經典劇《大時代》,無綫為配合熱潮,昨日突然宣布於下周一深宵(即21日凌晨12時15分)重播《大》劇,引起熱議!股民怕「丁蟹效應」隨時再現,拖垮股市!

香港股市近日牛氣衝天,昨日恒指更升穿28000點,猶如無綫經典劇集《大時代》中的「大奇蹟日」來臨,引得網民熱烈討論。有見及此,無綫突然決定於下周一深宵(即21日凌晨12時15分)開始重播《大時代》,但由於當年《大時代》引申出「丁蟹效應」,即由1992年鄭少秋飾演「丁蟹」開始,往後幾乎每次播出由他主演的電視節目,香港恒指都有不同程度的下跌!

無綫指宿命已打破

不少股民聞言無綫重播《大時代》即刻「喊驚」,有人留言「嗱嗱聲20號前放晒佢先」、「大家小心啲呀」、「呢套神劇勁過一般秋官節目,簡直係「明燈」代表作!」

原本現時深夜時段的《衝上雲霄》播畢後,無綫計劃以張智霖、吳鎮宇主演的《衝上雲霄II》接棒,對於突然變陣重播股壇「明燈」劇《大時代》,無綫企業傳訊部副總監曾醒明解畫:「因應近期股市氣氛,決定播《大時代》配合熱潮。」問到會否怕「丁蟹效應」再度拖垮股市而惹來非議?曾醒明說:「秋官呢個宿命已經打破咗!佢主持《Sunday靚聲王》都一排,個市仲節節上升,證明秋官即將有另一個效應開始!」

秋官:希望個個發達

鄭少秋昨日透過電話回應,他認為無綫重播《大》劇乃好事,並希望股民個個發達。談到近日港股狂飆,他笑謂:「雖然大家話我係明燈,但我冇受影響,平時都係老婆負責股票買賣,最近都賺到幾餐餸。(餐餐食鮑魚?)梗係豐富啦,但實際賺幾多唔知,因為係老婆負責。」

而《衝II》男主角「Cool魔」張智霖對被丁蟹「撼低」未有介意,他說:「重播咋喎!」同樣有份主演《衝II》的馬國明就話:「最緊要係好劇,我都一定會追!」其實秋官最近主持節目《Sunday靚聲王》,更表示想拍劇,已令網民議論紛紛,怕「丁蟹效應」再現令股市下跌,不過秋官冇有怕,早前更大講股經:「梗係升啦!阿里巴巴、騰訊都升得好緊要!大家拭目以待,個詛咒都破咗啦!」

文:專案組