鄧鉅明出錢出力保恩愛

太子珠寶鐘錶主席鄧鉅明太太鄧宣宏雁昨日首次擔任保良局總理,鄧生親身撐太太就職,鄧太笑言希望丈夫既出錢又出力支持她,更揚言會全程投入行善,減少上班,向來風趣的鄧生就笑稱少見面夫妻可以更恩愛!

昨日鄧鉅明太太鄧宣宏雁出席保良局就職典禮及慈善晚宴,其他出席的名人還有「玩具大王」蔡志明夫婦及「鯊魚女」陳細潔、蕭定一等。其中剛第一次擔任總理的鄧太獲丈夫陪同現身,她笑言最需要丈夫的金錢支持自己的職務,鄧生即表示無論在時間、心理及家庭上,都會全力支持太太,並開玩笑說:「全家總動員支持老婆,不過我要節衣縮食啦!」在旁的鄧太甜絲絲說:「你努力做嘢就得啦!」

少咗見面變好事

鄧太又直言已向丈夫申請減少上班,因為要投入保良事宜,愛妻號的鄧生即大表贊同:「對我哋兩公婆都係一件好事,見少咗反而會仲恩愛啲。」公然打情罵俏。

陳細潔無暇拍拖

而將於2017年榮升保良主席的陳細潔,坦言不捨得現時副主席的職位,因為明白將來做主席,一定會更加忙碌。早前她被胞姐陳小寶催婚,問她可會閃婚?她笑說:「如果結咗婚一定散,我做主席冇時間,自己返工都冇時間處理保良嘅嘢,何況拍拖結婚?(依家有冇人追?)有,但始終冇一個人令我想結婚,唔知點解啲人覺得我個樣刻住適婚年齡?有幾個識咗一陣就話想同我結婚。」她表示男士們若有善心、喜歡小狗及愛喝紅酒都會加分呢!

文:名人組