星級股神賺到笑

恒指昨日全日狂升961點,牛氣衝天。主板成交破歷史紀錄達2,500億港元,成為股民熱話。不少圈中藝人亦有投資習慣,相信亦因恒指狂升而有所進帳。

趙哲妤:「昨日放兩隻股份賺得四萬元。今個月先後放股總共賺咗六萬多元。依家要儲銀彈待五月股價跌再入貨。知道阿里影業股價急升約37%會開始留意下,真係升得好犀利!等跌番正常先入股。(大手筆買?)唔會,我好節制,我怕自己心臟病發,可能入住五萬先,睇定咗先再入多啲。」

陳百祥:「我唔識股票,話畀你聽同推我去死冇分別。(有賺少少?)同所有香港人一樣,增長咗少少啦!譚詠麟最叻玩股票,起碼賺十場演唱會,你問佢啦!香港係一片福地,加上北水南流,中國國際地位提升,帶挈香港受惠。(最成功一役?)我哋呢啲上市公司,唔應該晒命,總之我成副身家都喺晒股票。(身家有幾多?)養得起黃杏秀咁啦!」

張智霖:「自己入巿幾多就唔講嘞,不過今日(昨日)個氣氛幾好。如果大家有多餘錢嘅話都可以考慮嘅,但最重要係量力而為,要為自己定一個止蝕價,千祈唔會過火。」