華哥賊男的浪漫 射出兄弟情

任達華、吳鎮宇、譚耀文及鄭浩南在新片中演一班賊,有場戲為表達四人的兄弟情,導演安排他們一起對着大海小解,事前幾位型男飲了大量清水,到拍攝時即大解放,還鬥射得遠。另一場戲他們則合力用保齡球當武器對付敵人,結果奏效,盡顯四人的威力!

任達華、吳鎮宇、譚耀文及鄭浩南於英皇新片《衝鋒車》內結成一黨,改裝小巴作警車計劃犯案,卻遇上另一幫對社會構成極度危險的悍匪,華哥一行人選擇「替天行道」,協助警方破案。

各自隊一公升水

《衝》片導演劉浩良將華哥等四人的兄弟情作深刻描繪,其中一場戲安排他們齊齊對着大海小解,加埋超過200歲的四人忽發奇想「嚟真」,華哥昨日受訪時表示:「拍攝前半粒鐘,我哋各自隊咗一公升水,飲到胃脹兼真係尿急,拍嘅時候大家咪鬥吓邊個射得遠囉。(唔尷尬?)又冇喎,大家男人嘛,最辛苦其實係忍尿過程囉!雖然今次拍攝過程幾辛苦,不過又真係好耐未試過開工開得咁開心嘞。」

鎮宇打坐等埋位

據悉,當時有兩部攝影機拍下四人的小解過程,由於機位問題四人更要屙完再屙,一向懂養生的鎮宇則趁等埋位時,坐在海邊打坐禪修,可謂「臨危不亂」。

另外,有場戲華哥四兄弟碌出保齡球,攻擊悍匪姜皓文坐的車,令該車翻側,華哥直指拍這場戲辛苦,並要使出真功夫,他謂:「啲保齡球好重,攞嚟做『武器』唔係咁爽,要好識得用力,好彩冇扭親手。」姜皓文及拍檔思漩則被困於車廂內動彈不得足足一整天,認真慘情。拍攝後華哥等更拿着保齡球與拍戲用的警車合照,期間對着鏡頭狂擺甫士鬥chok。

文:影視組