謝安琪讚俊美一對

謝安琪(Kay)昨出席香港青年協會賽馬會「萬馬奔騰‧萬眾一心」活動,談及合作拍攝其「處女劇」《殭》的鄭嘉穎與陳凱琳傳撻着,Kay表示沒留意報道,問在片場有否覺得嘉穎與凱琳眉來眼去?她說:「冇留意,大家都有溝通有傾偈,我同凱琳都啱傾,佢好活潑。(佢哋襯唔襯?) 好俊美嘅一對!」Kay表示劇集拍至下月底,而本月底會到荷蘭取景,拍攝三星期,問囝囝會否特別不捨得?她說:「佢成日都唔捨得我,帶唔到佢去,拍攝進度好急,每日只得幾個鐘瞓。」

有份拍《殭》的陳山聰早前亦被傳力追凱琳,對於凱琳被指與嘉穎拍拖,他謂:「拍《殭》以來,我主要對住嘅係嘉穎,開工咁耐我只係同陳凱琳拍過一場戲,所以唔會八卦其他嘢,都冇乜好回應,只顧做好自己嘢。」