姜大偉開工心翳 漏夜送院

「再鋒利嘅刀,都有生銹嘅一日,何況係人呢?」現年67歲的資深演員姜大偉,前晚拍攝無綫劇集期間突然感到心臟不適,台前幕後即時停工,同場有份拍攝的女婿曹永廉,鑑於外父數年前曾接受「通波仔」手術,遂不敢怠慢,即時陪外父到醫院檢查。姜大偉檢查後無大礙,留院一晚昨已出院,但基於安全起見,今將晤家庭醫生作詳細檢查。

現年67歲的姜大偉(John哥)闊別無綫三年,近日再次參與無綫新劇拍攝,與黎耀祥、陳國邦、胡定欣、唐詩詠、林夏薇及女婿曹永廉等結劇緣,在《公公出宮》飾演老爺,除劇中角色非常重要外,無綫亦相當重視拍過《再見亦是老婆》、《巴不得爸爸》、《女拳》等經典劇的John哥,《公》劇開鏡記者會更隆重其事,率先介紹他出場,以示尊重。

「工作量唔辛苦」

John哥、曹永廉、林夏薇等前晚在無綫拍攝廠景群戲,約於晚上11時左右,John哥突然感到翳悶唔舒服,工作人員即時停止拍攝,並讓他稍作休息,現場各人均十分擔心。曹永廉鑑於外父數年前曾接受俗稱「通波仔」的冠狀動脈介入手術,擔心John哥身體,遂不敢怠慢,即時陪外父到將軍澳醫院檢查。姜大偉留院一晚,接受抽血檢驗後並無大礙,昨早已出院。

昨傍晚時分John哥接受本報電話訪問,透露身體情況說:「都冇乜嘢特別,check咗個心,報告話冇乜事,聽日(即今日)會再睇埋家庭醫生,我始終做過『通波仔』,就算依家身體感覺冇乜嘢,都想穩陣啲。(拍劇捱夜辛苦?)都唔算,一日一組通告,都係十個鐘啫,我仲唔係日日係咁添,只係間唔中,好多時係返嚟拍兩三場就走,工作量唔算辛苦。」

林夏薇鬆口氣

曹永廉昨亦在電話中憶述事發經過說:「我當時喺現場見到外父話個心翳住翳住,我咪即刻陪佢去醫院檢查,驗咗身、check咗血,話佢身體冇大礙。」

劇中飾演John哥女兒的林夏薇亦放下心頭大石,她說:「尋晚(即前晚)拍拍吓,John哥突然話個心唔舒服,大家都好緊張,即刻停晒唔拍住,等佢抖一陣睇吓會唔會好啲,後尾阿廉送咗佢入院檢查,因為我今日(即昨日)開外景,我都係打畀阿廉問番John哥情況,知道佢休息緊,就唔騷擾佢住。」

暫停拍攝戲份

監製羅永賢則謂會調動通告讓John哥休養身體:「我哋已經暫時調咗通告,停咗John哥嘅戲份,等佢睇埋家庭醫生先,安安心心後日至返嚟開工。(佢工作量過大?)佢個角色好重要,大部分嘅群戲都有佢份,我哋九成九嘅外景喺內地拍,香港外景基本上唔多,呢排都係拍廠景,一日一組,但老人家身體唔舒服應該正視。」

文:影視組