陳嘉佳被寸「分量」夠 遲到零歉意

藝人陳嘉佳(細細粒)前日拍攝海報因遲到四個半鐘辣着攝影師Sunny,曾為多位歌手拍攝封套的Sunny嬲得將其「惡行」放上網「公審」,Sunny直指對方毫無悔意,沒道歉之餘更大搖大擺,並寸爆細細粒說:「最大份明星。」

身兼攝影師及電台主持的Sunny前晚在Facebook上載一張攝影棚相片,並刻意將陳嘉佳(細細粒)打矇,留言:「約四點半,九點才到!」明顯對細細粒遲大到感不滿,網友Nic Yan留言指細細粒耍大牌,更有網友Bitty Betty Chan爆料:「係咁o架,之前教佢跳舞又話呢樣做唔到,嗰樣做唔到。」

大搖大擺冇道歉

Sunny昨日在電話中表示為好友葉念琛影海報,他說:「細細粒係其中一個演員,原本我哋六點收工,佢不停話遲少少,搞到夜晚十點先收工,白等佢四個幾鐘,嚟到道歉都冇句,仲大搖大擺。」問到會否覺得對方不專業?Sunny說:「我只想講,你嘅時間就係時間,工作人員都係時間,要我哋乾等好忟。(唔再同佢合作?)每年我都同好多人合作,可能依家未必選擇合作,明白藝人遲到好正常,而唔係遲四個半鐘,佢係最大份明星。」

細細粒:解釋唔到

細細粒坦言當日家中有事,亦即時通知劇組人員,她說:「原本係約四點,屋企臨時有事,同劇組講咗可唔可以第二日影,唔好等我唔知搞幾耐,之後覆我話等今日影,我已經話最快八點半到,可能溝通上有問題,解釋唔到咁多,都冇特別澄清。」至於,剛由內地返港導演葉念琛表示會了解。

文:音樂組