Alice B.冧男友Plan定生10個
混血模特兒Alice B.和Lea T.昨日齊齊出席復活節活動，兩人均以超短裙上陣，露長腿大鬥性感，十分惹火。其中Alice被本報獨家報道蜜運中，她在現場甜蜜大談巴西籍男友要她生10個B，而Lea則唱反調喜歡自己一個人！
「第四代Canon甜心」Alice B.和霍啟山前緋聞女友Lea T.昨日一同出席「apm x Peter Rabbit暢遊復活甜園」活動，樣靚身材正的二人穿連身超短裙亮相，兩人除大騷長腿外，Alice還大騷香肩，而Lea則稍露事業線，各有賣點，實行來個性感大鬥法，非常吸睛！
搵到「領航員」
被踢爆正沐浴愛河的Alice表示，男友正身在內地工作，故她需要有耐性地靜候他回來。問到與巴西籍男友是否已發展為同居階段？她說：「未係，但我哋有好多話題，佢仲同我講笑叫我生10個BB，但邊生到啫，不過佢真係一個好sweet嘅人，好照顧我同令我成個人健康咗。」她又爆二人「定情之吻」是對方牛一：「佢生日嗰次係我哋第一次錫，依家拍咗兩個月拖啦，佢好識安慰我，令我唔再緊張，好開心有佢做我男朋友！就算依家分隔兩地，我哋每日都會視像通話及send訊息。」至於男友如何稱呼，她則保持神秘說：「佢既係model又做生意，佢好靚仔，係我嘅『領航員』。」
喜歡活在當下
至於早前獲歐洲富豪邀請到私人島上參與生日派對的Lea，被問到該富豪是否想追求她？她即「落閘」說：「佢係我嘅好朋友，我冇諗過要發展，（你對佢有冇興趣？）我唔會咁諗，因為我係個冇計劃嘅人，唔會知聽日發生咩事，所以活在當下最緊要，（會唔會想同有錢人約會多過普通人？）我唔想約任何人，我好鍾意自己一個，我覺得咁樣更加可以吸引到男人！」
文：名人組