Kay膽粗粗抓歌 獲顧嘉煇口頭應承
歌手謝安琪（Kay）雖然是網民心目中的頂級女神，魅力不容忽視，但原來女神的魅力不是萬試萬靈！Kay前晚錄影無綫節目時，自爆年前曾主動要求殿堂級音樂人顧嘉煇為她作曲，但截至前晚她的願望仍未能成真，不過已經有所進步，她說：「佢上次點吓頭，今次口頭應承咗，口頭承諾都有法律效力o架，嘻嘻！」
謝安琪（Kay）、汪明荃、鄭少秋、陳潔靈、葉麗儀、區瑞強、森森、斑斑等一批唱家班，前晚到電視城錄影由鄭丹瑞擔任主持的《樂壇教父顧嘉煇》節目，向殿堂級音樂人顧嘉煇致敬，煇哥執到正以「踢死兔」造型與嘉賓們合照，Kay則恍如小Fans帶着朝聖心情錄影節目。
葉麗儀幫口
Kay自爆獲顧嘉煇承諾為她作歌：「其實上次我做佢演唱會（2012年《顧嘉煇大師經典演唱會》）嘉賓時，已經開口問煇哥：『你可唔可以幫我作首歌？』，當時佢點吓頭，咁我一直等，但我怕醜，唔好意思追佢歌，心諗我開咗口，都叫霸咗個籌先，但今次見番佢，佢要榮休啦，我要大膽啲，於是請埋前輩陳潔靈同葉麗儀幫口，煇哥話：『有靈感就會作』，好嘢！佢上次點吓頭，今次口頭應承咗，口頭承諾都有法律效力o架，嘻嘻！」
鄭丹瑞添食
Kay如獲至寶後，不忘向煇哥作出靈感上的暗示：「煇哥有好多名曲，呢次節目有好多前輩，佢哋會唱番自己嘅歌，剩番嘅就我同張敬軒揀，上次我喺煇哥演唱會唱過《隨想曲》，我好鍾意呢首歌！如果軒仔想唱都冇所謂，我或者唱《烏卒卒》囉，煇哥都寫過好多好好聽嘅兒歌！」
鄭丹瑞則指他主持的另一節目《你健康嗎？》決定添食：「原本係十集，播完第一集，第二朝就收到電話，話有二十幾點收視，決定添食五集，我做咁多年電視都未試過。」
文：影視組