徐濠縈獲Eason人肉速遞浪漫慶生
【陳嘉敏巴黎直擊】徐濠縈前日現身巴黎欣賞時裝騷，此行獲老公陳奕迅人肉速遞巴黎為她慶祝生日，享用九道菜的晚餐，非常黐纏；阿徐更獲女兒錄音唱生日歌，難怪冧爆眼濕濕！
女星徐濠縈於巴黎時間3月9日現身當地舉行的Sacai 2015秋冬時裝騷，她翌日與「微博女王」姚晨、內地歌手李宇春及名媛曹穎惠現身另一時裝騷，阿徐透露蘇永康與老公陳奕迅（Eason）也有同行，笑言Eason對時裝沒有興趣，二人去了拍拖，更大爆Eason來巴黎是為跟她慶生，Eason先到英國探母親，再乘火車到巴黎為她慶生，她說：「我哋食咗九道菜嘅晚餐，但我時差得好犀利，食到要挨住牆，最後仲要減咗一道菜。（Eason送咗咩畀你？）人肉速遞自己，我哋有去河邊行，但太多人影我哋相，今年生日想Hea下，之前已經一家人去咗東京，生日願望係身體健康。」
逗留當地一周掃貨
阿徐又稱生日當日跑步時收到女兒的錄音大為感慨，她說：「生日嗰朝我去跑步，跑跑吓收到佢嘅錄音好感動，聽到我眼濕濕，佢用Adele腔調唱咗隻生日歌畀我，Eason都話好勁，佢好鍾意唱歌。（唱得好聽？）做媽咪梗係覺得好聽。」阿徐更透露已在當地逗留一星期為時裝店買貨，更希望下年可以參加在巴黎舉行的馬拉松，之後會回港參加10公里賽跑。
張馨予參見西太后
另外，「微博女王」姚晨及超模秦舒培將會出席SHIATZY CHEN時裝騷，二人昨日率先到店內揀戰衣，表現興奮。而內地女星張馨予日前穿上Vivienne Westwood Gold Label 2015春夏新裙在巴黎出席時裝騷，並到後台與品牌設計師Vivienne Westwood合照。
