崔碧珈峰騷揸槍 秒殺欣宜

擁有G奶噴血身材的崔碧珈(Anita),與鄭欣宜及何佩珉日前於柴灣為新戲拍攝海報,騷巨胸「壓場」的Anita自爆於戲中不時「胸壓」對手:「會挨埋去同佢調情!」畏高的她又自爆與欣宜拍游繩戲份時嚇到淚灑當場!

有「G奶謝安琪」之稱的崔碧珈,日前與鄭欣宜及何佩珉為電影《辣警霸王花》拍攝海報,其中身穿高衩短裙的Anita更出動Big爆「西瓜胸」及長腿,一舉揮低眾女!

游繩爆喊

現場所見,於戲中飾演火辣警花的Anita晒出三吋事業線,更手執槍枝成功「秒殺」現場人士!身材驕人的她自爆於戲中頻頻施展「胸壓」美人計,實行壓到對手「冇氣抖」:「我需要誘惑目標人物,會挨埋去同佢調情。(打扮性感?)呢個角色胸大,着one size警服會顯得好逼。(尷唔尷尬?)唔會,接劇本時已經覺得好玩。」問到拍攝期間的難忘事時,畏高的Anita大爆要與欣宜「爆喊」玩游繩:「我哋唔敢落去,驚到手腳都震晒!導演(錢國偉)大聲叫我跳唔到就唔好跳,於是我諗佢係咪叫我唔好拍?咁我就即刻一路喊一路游落去!」

見紅收場

而欣宜以晚裝「姿整」現身,她自爆於該游繩戲份中嚇到講定「遺言」:「我驚到喊,又狂嗌『我仲未生仔,我唔想死住呀』!(克服咗畏高症?)應該有用,我正日生日仲去拍攝跳急流。(有咩安全措施?)得一條繩!不過導演同監製對我好好,佢哋話可以用替身,但替身身形同我唔多似,最後就冇用到。」至於有武功底子的何佩珉即場以木梯大晒腿功「搶鏡」,毫不錫身的她更自爆拍攝首日已踢腫右腳,其後更被碎片鎅破腳板「見紅」收場,賣力非常!

文:影視組