阿刨讚任姐公道 一「是」同仁
在港做完廿五場折子戲後，粵劇名伶龍劍笙（阿刨）已於早前返回加拿大過年。羊年伊始，總會憶起昔日與師傅任劍輝的過年軼事，因為任姐在農曆年尾生日，阿刨每年都會趕排完戲後到任姐家中斟茶食飯，第二朝拜會逗利是。年復一年，這些記憶永存阿刨腦中，儘管是師傅得意門生，但阿刨自爆逗任姐利是不會特別大封，因為師傅永遠一視同仁。
今天是大年初三，每逢新春，阿刨都會憶起對師傅任姐過節的片段，她接受本報專訪時，自言過年第一件事，就是拜會任姐逗利是，她說：「以前過年前會忙住排戲，任姐年尾生日，我哋會盡快排完戲，就拿拿聲去斟茶食飯，跟住又去再排，第二朝就去搵任姐逗利是，年年都係咁開心，真係令人難以忘懷！」身為任姐得意門生，大家都以為阿刨的利是定必最大封，但阿刨卻說：「唔會，任姐好公平，一視同仁，任姐個個都錫！」問到任姐過年最喜歡吃甚麼？阿刨笑說：「問仙姐（白雪仙）啦，佢最清楚！」
最叻煎荷包蛋
談到本身最愛吃甚麼新年小食，阿刨表示以前因為要Keep住靚聲，所以要戒口，錯過了很多美食：「後生因為要做戲，所以唔可以放肆食煎炸嘢，辣嘢我又唔受得。到依家可以食，但又因年紀大唔食得，整定同美食擦身而過，不過睇見人哋食都好開心，唔使一定自己食！」阿刨謙稱並非廚藝高手，最叻是煎荷包蛋：「暈低，我煮嘅嘢只係食得你唔死，我冇乜拿手小菜，最叻煎荷包蛋！」
松哥教回春功
儘管阿刨已經70歲，不用敷mask，依然keep得咁靚咁fit。談到養生之道，原來全靠松哥劉松仁：「松哥教咗我幾招回春功，一連串動作，有三款，日日做會好啲，自己又會練平日基本功嘅動作，壓腿之類，令筋骨更鬆！」
阿刨現在已移居加拿大，雖然仍很記掛住香港，但她坦言十分享受在加拿大生活：「我住嗰度唔使成日剷雪，就算種花都係落吓種子！但一定要做家務，清潔地方，要親力親為！」
文：專案組
攝：劉智源