祖兒超開心：似發緊夢！
天后容祖兒最近翻唱「歌神」張學友廿年前的經典作品《這麼近那麼遠》，更難得獲歌神助陣演出MV，祖兒形容自己像發夢，她笑說：「真係好開心，成件事好夢幻，好唔真實，佢仲幫我錄VO，肯定成為我心目中喺工作上一個經典，好心滿意足，係送畀我最滿意嘅情人節禮物。」
祖兒坦言翻唱別人的歌有一定壓力，當日跟黃偉文挑選翻唱學友《這》歌時，巧合地發現這歌是學友作曲，她說：「我親自問學友哥哥話想翻唱佢首歌，問佢介唔介意？」學友認為是非常好的決定，可以為這首歌的生命延續，當構思MV時，有同事提議她邀請學友參與，她說：「我第一個反應係話黐線，呢件事完全係妄想、唔敢諗，直至有日食咗勇氣丸，親自問學友有冇興趣拍MV，學友話要諗吓有乜做，當睇到導演嘅故事大綱就一口答應，真係好多謝佢友情演出。」
歌神現身全場緊張
祖兒透露當學友出現時，大家即肅然起敬：「食緊飯盒都掃晒落垃圾桶，好緊張呀，但又好興奮！歌神真係好厲害，幾個眼神就交代晒！」她又趁機跟學友話說當年，憶起當年出席梅艷芳生日派對，在停車場撞到學友架車，她笑說：「我問學友記唔記得，佢反而印象深刻我問佢唱歌心得，當時佢話你唱多兩年，有問題再問我，依家唱咗十幾年，佢話當中我咁多難關都過咗，證明到我呢個歌手都有小小成績啦。」此外，祖兒昨日在網上大晒心形花盒，不知是否男友劉浩龍送呢？
文：音樂組