特首女圓星夢 梁齊昕演社工
成為近日全城熱話的特首女兒梁齊昕，曾表示有意加入娛樂圈，現在她終於一圓星夢，被香港導演劉俊輝邀請擔正做新戲女主角，並飾演社工角色，「處女下海」的她昨日在首個記者會中因為身體不適而無法出席。
昨日電影公司舉行《男極探射燈》（暫名）記者招待會造勢，打住梁齊昕的旗號下，吸引不少傳媒到場採訪，該片男主角李逸朗、導演劉俊輝及一眾演員均預早到場，劉俊輝更大談齊昕在片中的角色。
（記：記者 劉：劉俊輝）
記：梁齊昕今日會嚟？
劉：佢答應咗會嚟，簽咗約，係咪重金禮聘就好難講，有錢人可能覺得唔重，六位數字。
記：梁齊昕戲中做咩角色？
劉：社工，佢有演藝細胞，當培育細路女。
「邊個聰明人唔百厭」
記：當中有床上戲？
劉：有床戲，佢成日喺張床咬朱古力，成日畀啲蟻咬，親熱談情嗰種，會否着三點式就睇吓佢哋拍拖有冇游水。
記：梁齊昕有冇設底線？
劉：佢畀我拍我都唔會拍，唔係怕佢背景，因為分分鐘部戲會上大陸，有時可能會有粗口嘅對白，不過唔係佢，喺戲中嘅人。
記：投資咗幾錢？
劉：都成千萬，會喺香港開，3月8號正式開鏡。
記：同梁齊昕傾咗幾耐？
劉：都簽咗個幾兩個月，傾都係個幾兩個月，唔使盛意打動佢，佢鍾意拍戲而我又鍾意拍戲，佢好捱得，點辛苦唔驚。
記：對佢印象點？
劉：好聰明，係一個好女仔，邊個聰明人唔百厭，之前有同佢試戲，都係叫佢跟住啲稿去背對白。
身體不適記招甩底
事後劉導演在記招尾聲，指齊昕忽然感到身體不適，前往會場途中仍需要折返家中休息。
劉：啱啱聽到消息，齊昕嚟唔到，佢上咗車但返轉頭，行都行唔到，人有事，收到消息係個人有事。
記：其實你同佢有冇聯絡？
劉：成日同佢講電話，食飯同飲咖啡，如果搵唔到佢，又點會搵佢拍戲。
記：套戲仲拍唔拍到？
劉：點會拍唔到？簽咗約點會拍唔到，冇話拍唔到，人唔舒服都冇辦法。
記：拍唔到會唔會告佢毀約？
劉：簽咗約點會唔應承拍，拍唔到先算，佢身體比較差。
記：佢身份會唔會比較難告毀約？
劉：唔舒服冇法，再算！
記：屋企人其實知唔知佢拍戲？
劉：又唔係搵佢屋企人拍，佢又唔係得17歲。
父親角色大賣關子
待記者會完結後，劉導演接受本刊電話訪問，問到假如真拍不成，會否有後備計劃，他語氣堅定說：「我對佢仲好有信心，暫時未諗過。（佢戲份好多？）好多同佔好重要。」至於誰飾演她的父親，外界盛傳由陳惠敏飾演，導演對此大賣關子，表示暫不公布，要保持神秘感。對於在新戲中陳惠敏與梁齊昕是否演父女，記者致電陳惠敏，他說：「我同朋友食緊飯，乜嘢問題都唔答住。」