張家瑩 筱靖 貪靚孖妹各自搵食

同年亞姐出身的張家瑩及筱靖因選美結緣,經常「孖公仔」示人的她們更「例牌」爭艷鬥麗。私下無所不談的二人直認合拍,但又大爆喜好完全相反。身為素食者的的筱靖表明只愛靚仔,故搞笑揚言絕不會與獨愛才子的家瑩「爭仔」又「爭食」!

筱:筱靖 張:張家瑩

1.一眼結緣 雞啄唔斷

家瑩及筱靖自2007年參選亞洲小姐結緣後,二人不論幕前幕後均「行孖咇」示人。直認「大癲大肺」的筱靖自爆與家瑩性格完全相反,但卻與對方有談不盡的話題。

筱:我去亞姐面試時第一眼見到你就直接走嚟同你傾偈。選美後我哋就好自然做乜都黐埋一齊。其實我份人好外向同亂七八糟,而你就冷靜又有條理。你成日會畀意見我,算係我嘅軍師!

張:你份人大癲大肺,有嗰句就講嗰句。你做嘢比較衝動,我同你相比就好保守。不過我哋都有個共通點,就係鍾意打扮得健康性感,好傾得埋!

筱:係呀!我記得有次同你拍旅遊特輯,明明聽朝要七點到場,但都喺間房傾到凌晨四點!我瞓唔着覺得悶就會狂講嘢,唔需要理你感受,把口成支機關槍咁咩都講!

張:你個名改得好,筱靖即係「少靜」,靜少少都唔得。雖然你一輪嘴咁講嘢,冇理過我感受,但同你一齊時間過得好快,嘻嘻哈哈又一日。

2.家有富爸 爭認草根

家瑩及筱靖雖然向來作風低調,但憑二人分別開設餐廳及為咖啡品牌取得全國代理權所見,她們仍難掩家底豐厚的事實。話雖如此,兩位千金小姐卻從未偷懶,一直互相努力為事業拚搏!

張:我最多算係中產家庭,拍落你度的話,我直頭係草根階層!

筱:我係草根咋!飲食業係我家族生意,我代理咗種咖啡,遲啲會遍布全國每個省。其實坦白講,做藝人係場持久戰,過程需要屋企支持。我欣賞你條件同能力都好,但就冇坐喺屋企咩都唔做。反而你係實幹型,又唔會推job!

張:你食素而我開餐廳。如果我哋合作,我間餐廳就可以加入素食餐單!或者你可以開間齋舖,淨係做娛樂圈中人嘅生意都夠食!

3.力排眾議 見姊妹情

家瑩及筱靖曾不約而同地離開「娘家」亞視,其後又齊齊回巢。當中敢言的筱靖因開腔大談薪金問題而疑似被公司「雪藏」,她重提此事時感激家瑩雪中送炭!

張:你多嘢講得嚟份人好直率,所以我會過濾吓你講嘅嘢。之前有報道話你講錯嘢被人雪藏同冇工開,但除非我親耳同親眼見住你講,否則我唔會信!所以當時我第一時間打電話畀你,直接問清楚件事。

筱:我睇報紙就知道你人前人後都好撐我,我好感激你雪中送炭,呢啲咪朋友囉!

4.各有所愛 唔會爭仔

仍然單身的二人自爆一旦遇上真命天子就會「戀愛大過天」,而相信一見鍾情的筱靖更笑言擇偶首選100%靚仔,故絕不會與獨愛才子的家瑩「爭食」!

筱:我哋唔會爭仔,因為我要100%靚仔,心情差時望吓佢就會開心番!

張:你真係傻傻哋o架!點可以咁膚淺淨係睇樣?男仔最緊要有才華,令我崇拜同欣賞!

筱:咁我拍拖會跟感覺行,我又信一見鍾情,所以次次都拍得轟轟烈烈,喊到要生要死!

張:你成日為小事喊餐飽,好似個男仔唔聽你電話,你就用六、七個唔同電話號碼「炸」佢,直到搵到佢為止。

筱:咁真係work吖嘛,用另一個號碼就打得通!我都知自己太多嘢講,講嘢又唔太經大腦,希望可以搵到個接受我缺點嘅人啦!

後記

老友鬼鬼的家瑩及筱靖經常相約食飯及吹水。而身為素食者的筱靖大爆獲家瑩於自家餐廳,為她度身訂造素食菜式「柿子沙律」及「牛油果壽司」。筱靖又搞笑自認為食:「我超鍾意食零食,特別係薯片!我成日上嚟踩你場,逼你專登整啲素食畀我!」

家瑩即笑指對方「玩嘢」:「我間餐廳出名食牛,你食素仲成日要上嚟食,我都唔知你係咪玩嘢!所以索性請廚師整幾道素菜嚟應付你!」

筆錄:孺

攝影:黎志輝

場地:牛禪

筱靖化妝:Sharon Lam

筱靖髮型:Derek Choy