黎耀祥夢想住山頂 夾份買豪華劏房
視帝黎耀祥（祥仔）數目精明，多年前已有自置物業的祥仔寧願租屋住，暫時拒絕「入市」，更打趣推出「千萬豪華劏房」計劃，與友人夾份進駐山頂，實行「有福齊齊享」。
祥仔、呂慧儀、曾華倩、糖妹及張美妮等昨日雲集山頂一間市值2.8億元的豪宅，拍攝無綫賀年節目《家家有喜事》。節目以戲劇形式錄製，祥仔被安排扮演豪宅業主，難得他相當「入戲」，接受訪問時搞笑地說：「大家隨便坐，當自己屋企就得。（面對2.8億豪宅，有冇心動？）我諗住搵十個八個朋友夾份買呢度住，最多變身『豪華劏房』。」
流動資金揸手
祥仔目前以月租約五萬租屋住，他卻形容為「價廉物美」，暫無意入市：「我計過條數，如果要買我依家租住嗰層樓，淨係銀行上會利息都貴過交租，仲有其他雜費未計呢，但我可以有流動資金keep住喺手喎！」談到投資之道，祥仔卻謙稱「唔叻」：「都係放喺銀行，或者買吓股票咁囉。」
呂慧儀收咪咪
「長腳蟹」呂慧儀打扮密實冇睇頭，她笑謂：「我（咪咪）依家屬於囝囝嘅，唔以亂咁露出嚟，況且我要小心健康，唔可以冷病，因為仲餵緊人奶嘛。」農曆新年將至，她表示會帶五個月大的「蟹籽」四出拜年逗利是，問到新年願望是否「追多個」？她說：「我想生多個女湊成『好』字，好似陳茵媺咁就好嘞，不過我老公見我生產過程太辛苦，暫請我『食檸檬』。」
文：影視組