祖藍晒哭腔戰李逸朗

一連兩晚假會展舉行的《HEA爆香港演唱會》昨晚開騷,王祖藍綵排時表示會以近期大熱的哭腔演唱,實行向李逸朗挑機!祖藍亦會大唱冧歌,但表明沒準備驚喜給未婚妻李亞男,因為怕婚禮上會「冇貨」!

王祖藍、蔣志光及韋綺姍等昨午為演唱會綵排和拜神,祖藍表示兩晚的演唱會門票已售罄,早前更有美、加及廣東等地的人想邀請他們做巡演。他謂演唱會有笑和喊的部分:「笑就我會講幾句,喊就因為我會用哭腔唱《老表,你好hea!》主題曲。(挑戰李逸朗?)好聽好多,唔係,係慘好多!」

祖藍更透露會唱冧歌,問是否冧未婚妻李亞男?他說亞男要工作昨晚未能到場:「佢預計到婚後會冇零用,要積穀防饑!不過佢聽晚(今晚)會嚟。」問會否製造驚喜給亞男?他謂:「再畀驚喜我驚喺婚禮冇驚喜,要留番啲喺婚禮用!」

新居裝修未搞掂

蔣志光與韋綺姍在騷上再合體,問蔣志光有否打算再出碟?他謂曾有人找他斟過:「如果我出一定有老闆,但問題係我嘔唔嘔到歌出嚟!(平時冇寫定?)冇,同酒樓點心一樣,即叫即蒸!」之後蔣志光透露曾有內地電視台邀請他參加歌唱比賽,但他拒絕了。

另外,祖藍舅父一直為祖藍跟進新居裝修事宜,昨日他把浴缸底漏水的相上載到網上,本報致電了解時,他表示到凌晨四點多才整理好,事件更令祖藍母親非常憤怒,祖藍昨表示希望不開心的事情盡快過去。而蔡少芬昨在微博大晒祖藍與亞男的喜帖,並祝他們幸福美滿。

文、攝:音樂組