王馨平認反叛：所有嘢係我揀
娛樂圈的「星二代」靠「星爸」、「星媽」在圈中名聲快速冒起，往往在出道之時就已成為焦點。其中王馨平（Linda）算是早期的星二代，在演員父親王羽和母親林翠的護蔭下進軍樂壇，甚至有傳Linda連感情事都由父親掌控……事隔多年，Linda自爆是反叛女，強調自己並非扯線木偶：「我有自己諗法！」道盡背負星二代的辛酸之路。
聽父親建議入行
初初出道多多少少都要聽佢（爸爸）安排，嗰時我啱啱大學畢業，出嚟社會第一份工就係歌手，我爸爸又係呢行嘅人，佢有經驗，會話畀我聽應該點做。佢同我講要入呢行OK，但提議我要喺香港出道，因為孭住港星個名好吃香，咁佢覺得我有呢個條件，可以返嚟香港開始，就介紹咗我畀甄妮識，因為佢同甄妮係好朋友，呢啲嘢我白紙一張，就算唔係聽爸爸說話，都要聽啲長輩講。
原計劃在台灣出道
我其實一路都好反叛，係你哋唔知。我由細到大都好反叛，但我畢業出嚟做呢行係一件大事，我真係冇經驗，就算自己唔係咁鍾意，都應該聽一聽佢哋（父母）說話。所以我聽爸爸話，喺香港開始，如果照我自己原本計劃，就喺台灣簽唱片公司，再出去讀書。因為台灣有一批呢啲學生歌手，我準備喺出面讀MBA，暑假就返台灣出碟，但爸爸話邊有咁好嘅事，佢話做一件事，專心一志去做，唔好又讀書又做歌手，我諗一諗都覺有道理。
拒回首舊感情
當年有傳Linda與鄭嘉穎相戀，但遭到王羽棒打鴛鴦。已為人妻的Linda不欲再談過往的一段情，但她強調感情事一向由自己掌控，絕對不是被父親話晒事。
我結咗婚，以前嘅嘢唔想講太多，但唔係爸爸從中做啲咩（有指王羽拆散王馨平和鄭嘉穎），所有嘢都係我自己選擇，雖然我都算係乖女，但我都有自己諗法同性格，尤其係愛情主張，所有嘢係我揀，識到我老公決定嫁畀佢，都係我自己選擇，但嗰時嘅嘢已經唔想講太多。
下嫁現任老公的理由
我唔敢講話我係少奶奶，但係開心嘅。因為我先生真係一個性格幾好嘅人，同埋佢做人好成熟，喺佢身上我學到好多嘢，佢都好就我，呢啲嘢我冇得呃人，你哋睇我狀態都知我開唔開心，但少奶奶嘅話我唔想畀人感覺淨係識Shopping唔做嘢，我仲想喺音樂上做啲嘢。我唔覺得女人結咗婚就唔應該做嘢，我絕對覺得一個女人應該做啲嘢令到自己生命更加有意義，老公梗係支持我返工，如果佢唔支持我都唔做。如果佢係一個會管我咁多嘅人，我都唔會嫁畀佢。但佢絕對支持，唔會限制我做任何嘢，都因為係咁我先嫁畀佢。
靠實力闖名堂
雖然作為影星王羽和林翠的女兒，Linda表示做歌手之路與父母的不同，即使她承認有一定優勢，但仍要靠自身實力才能夠闖出名堂。
我唔算第一批「星二代」，算叫中間嗰批，第一批應該係關之琳，佢早過我入行，之後到我，再之後就到謝霆鋒。我嗰時都唔知咩叫壓力，我唔係行電影路線，我唱歌嘅，雖然我係「星二代」，但我爸爸媽媽係演員，演員圈子同歌手圈子唔同，但的確你一行出嚟啲人會識你，話你係某某嘅女，呢樣係幫到啲。但我覺得作為一個歌手，聽我歌嘅朋友未必知我爸爸媽媽邊個，優勢嘅話一半一半，始終都要靠自己有冇實力先可以闖出名堂。
做媽媽？不強求
生小朋友就隨緣，如果靠現今科技我覺得我試都有可能會有，但問題係我試過都冇，我同先生都覺得唔好啦，唔好搞咁多嘢，呢個係我哋兩個性格，如果我真係想要，不斷試可能都會有，但我性格唔係咁強求，我先生又係咁嘅性格，所以順其自然。我都答唔到你係咪好鍾意小朋友，因為我個妹或者朋友嘅小朋友，乖嘅咪鍾意，唔乖嘅見到佢哋都會心諗好在我冇生。
口述：王馨平
筆錄：音樂組
攝影：吳文聰
服裝：Cindyalan
化妝：Christy Li@MOD
髮型：Jacky Leung@II Colpo
場地：Pacific Place II Colpo