阿刨再演《紫釵記》提攜後輩
「我盼君、望君、醉君、夢君」本是《紫釵記》最為人津津樂道金句，如今卻成戲迷對粵劇名伶龍劍笙（阿刨）日思夜盼的呼喚。據知阿刨昨日已落實於今年12月在港演出10場《紫釵記》長劇。除為答謝戲迷外，阿刨亦有感當年獲恩師任劍輝栽培才有今日成就，所以望一盡粵劇承傳之責，提拔梨園新進，發掘更多接棒人。
名伶龍劍笙（阿刨）上月在香港完成25場粵劇折子戲《任藝笙輝念濃情》後，再為戲迷帶來喜訊，宣布將於今年12月23日至明年1月2日，假香港演藝學院演出十場《紫釵記》。是繼2006年演出34場《帝女花》後，阿刨再次在港演出粵劇長劇目，定必再掀撲飛潮。
任冰兒做顧問
主辦單位新娛國際負責人丘亞葵（Vigo）昨日證實阿刨將演出《紫釵記》。他說：「之前一直游說阿刨演長劇，但佢擔心合作人選。直至上次做完《任藝笙輝念濃情》，佢同一班年輕演員合作得好開心，覺得佢哋好有潛質，加上佢覺得師傅任劍輝教咗咁多嘢畀佢，佢都要為粵劇做番啲承傳工作。所以劇中花旦會由《任藝》合作過嘅李沛妍同鄭雅琪輪流擔任，而任姐妹妹任冰兒亦將出任藝術顧問。其他角色亦會起用新人，包括：梁煒康、文華、黎耀威等。呢班粵劇青苗同阿刨做對手戲，定必加快成長！」
返加拿大過年
Vigo續說：「阿刨對今次project好重視。原定做完《任藝》佢就返加拿大，但為咗《紫釵記》佢多留3星期，商討成個劇嘅安排。一月尾仲會影埋造型照，才返加拿大過年。呢段期間，佢不時提點新人演出要注意嘅事項。（點解揀《紫釵記》？）阿刨鍾情劇作家唐滌生先生嘅戲寶，雖然有好多，但《紫釵記》有好多書生、小姐戲，寫李益同霍小玉嘅感情亦寫得好好。阿刨好鍾意呢個劇。（只演十場會否未能滿足所有戲迷？）阿刨相隔多年再演長劇，都知戲迷會好關注，但香港演出場地難求。今次我哋只喺演藝學院做，售票安排稍後會公布，請戲迷留意。」
文：影視組