前港姐袁嘉敏露點演出月底正式上映的新片，希望藉此上位，可惜其戲中露點片段昨凌晨於網上瘋傳及遭截圖，大字標題寫明「露點無格」！電影公司得悉此事後大怒，隨即要求討論區剷走相關片段及「緝兇」，反而女主角袁嘉敏呼籲觀眾入場睇高清版！
袁嘉敏露點演出新片《鴨王》，戲中多場「激戰」盡騷其「澎湃」身材，原本「坐定粒六」等上位的她卻忽然遭「騎劫」，昨凌晨時分於網上討論區驚現她與男角何浩文的情慾片段及截圖，且以「袁嘉敏露點無格」為題，猶如AV口號，大批網友「無限loop」後更留言向她評頭品足，認真慘情！
事情很快傳到電影公司及導演區焯文耳中，天亮後第一時間採取行動，要求討論區「下架」。記者昨午與區導取得聯絡，他無奈稱：「好彩仲有幾場戲肉未曝光，總算係不幸中之大幸啦！依家積極『緝兇』，揪出幕後黑手，因為唔知佢手頭上仲有啲乜，攞晒出嚟就真係大件事嘞，套戲仲使上咩？不過直至依家都仲未有頭緒。」
至於袁嘉敏昨晚則聯袂拍檔何浩文（Dominic）及何佩瑜（Jeana）現身鬧市巡遊活動，一身性感打扮的她加上是非纏身，頓成風頭躉。對於自己的露點片段外洩，她心情未受影響，受訪時淡然謂：「一共有6場全裸戲，流出嚟嘅片都比較平淡，10分我會畀自己3分，大家入場睇會高清啲，相信會更加吸引，我亦冇留意啲網民嘅留言。」談到她與Jeana不和事件，袁嘉敏堅稱二人談不上朋友：「拍戲唔係畀你搞私人事嘅，係我孤立自己，我同佢同場得3分鐘，亦擔心同佢打招呼，佢會話畀記者知我騷擾佢。（即係話Jeana雙面人？）我唔識佢，佢都已經咁講，咁樣好難展開關係，做唔做朋友都係順其自然啦。」Dominic則力撐Jeana，受訪時暗寸袁嘉敏拍戲時經常「匿埋」，更笑指已「當佢透明」。
文：影視組