珍妮花拖仔V殺安祖蓮娜
第20屆Critics' Choice電影頒獎禮前晚在荷里活舉行，被視為死敵的畢彼特（Brad Pitt）前妻珍妮花安妮絲頓（Jennifer Aniston），與現任妻子安祖蓮娜祖莉（Angelina Jolie）不避嫌同場較勁。性感打扮的珍妮花更帶埋另一半示威！
安祖蓮娜自介入畢佬與珍妮花的一段婚姻後，兩位女星一直被視為仇人。2009年，二人就曾齊齊出席奧斯卡金像獎頒獎禮，安祖蓮娜當時更帶埋畢佬同行。6年後，兩位阿姐再度同場出席Critics' Choice電影頒獎禮。據知偕未婚夫Justin Theroux、以性感中空打扮現身的珍妮花先行紅地氈。幾分鐘後，單拖出席的安祖蓮娜就收起性感以銀色長裙上陣，認真「緣慳一面」！安祖蓮娜除輸唔夠性感外，其眼妝亦被批評化得太白，搞到塊面一撻撻有瑕疵。
同病相憐失獎項
珍妮花憑《Cake》在頒獎禮上獲提名最佳女主角，而安祖蓮娜則憑《非凡生命歷》（Unbroken）提名最佳導演，可惜二人最終均落敗收場！當茱莉安摩亞（Julianne Moore）獲頒最佳女主角時，有鏡頭就影到珍妮花眼泛淚光，似乎有點失望。二人除失落Critics' Choice之外，同日清晨公布的奧斯卡提名亦沒有二人份兒，可謂同病相憐。
米高捧三獎腳軟
至於賽果方面，賽前大熱《飛鳥俠》（Birdman）繼揚威奧斯卡九項提名後，再在Critics' Choice橫掃七個獎，包括原著劇本及攝影等。男主角米高基頓（Michael Keaton）繼金球獎後再奪影帝之餘，更獲最佳喜劇男演員及整體演出獎，一人捧走三獎。未知是否上台領獎領到腳軟，當他第三度上台領完獎準備落台時，突然差錯腳跌落台。有目擊者指事後米高步行時，一拐一拐，寸嘴主持Michael Strahan更開玩笑指飛鳥俠想試飛。除最佳男主角獎是金球獎翻版外，最佳電影、導演、女主角及男女配角的賽果（附表）都屬金球獎翻版，略欠驚喜！
文：外娛組