舒淇被攬腰拉臂 電暈Luke
性感女神舒淇與荷里活男星Luke Evans一同出席開幕活動任剪綵嘉賓，Luke透露舒淇Instagram追蹤者多過他，講笑舒淇必定比他紅。舒淇和Luke雖然第一次見，但兩人默契十足，不時拉手臂、攬腰及指手畫腳，獲帥男照顧的舒淇，一時放下警戒心，拋半胸俯身拾採青生菜，電暈全場男士。
舒淇與曾演《哈比人》與《狂野時速6》男星Luke Evans昨日出席BVLGARI全新香港旗艦店開幕，並擔任剪綵嘉賓。二人一見如故，舒淇不時拉住Luke手臂，拍照時Luke亦輕攬舒淇纖腰，盡顯紳士風度。店舖位於尖沙咀名店林立的廣東道，因此吸引不少途人圍觀。兩人見到粉絲不約而同指手畫腳又揮手，默契十足。穿低胸晚裝的舒淇，一時不為意俯身想拾起地上的生菜，拋出半胸，甚為吸睛，而與舒淇一同剪綵的兩位品牌高層Bulgari行政總裁Jean Christophe Babin和大中華區及澳大利亞董事總經理平興韜亦被她迷倒，Jean更貪玩地將剪綵的絲帶披在舒淇肩上，平興韜忍不住大笑起來，舒淇一面甜笑，甚為玩得。
冧讚粉絲比他多
首次來港的Luke表示只逗留數天，前晚已到山頂欣賞夜景。對於開幕舞獅表演，他表示以前在倫敦已欣賞過：「嗰時好遠咁睇，今次可以近距離欣賞，仲可以接觸，好有趣。」談到地道菜式時，他表示：「我好鍾意食點心，好想去大會堂附近排長龍間餐廳食點心。」Luke表示在港會有拍攝工作，故只有一天自由時間：「我會行荷里活道同搭船，仲會買好多手信，屋企人要我買磁石貼做手信。」問有否學廣東話跟港人溝通時，他拿出手機，然後以不鹹不淡的廣東話說：「祝你生意興隆！」當問到覺得「性感女神」舒淇怎樣？他大讚舒淇優雅美麗，有善和甜美，隨後笑說：「佢畀佢嘅Instagram我睇，話followers多過我，佢一定出名過我好多！」
馮德倫好好朋友
而舒淇對於樣貌俊俏的Luke，她笑言：「喺VIP房已經暈咗，佢好親切又靚仔。（佢係同性戀者！）係咩？冇所謂，咩人都好，最緊要善良同靚仔，哈哈！」提到Luke有份參演《哈比人》，她表示在戲中的他貼滿假鬍鬚，認不出對方：「好佩服外國男明星為拍戲付出，用特技化妝化到唔同樣。（你肯唔肯？）有要求過，但導演永遠都拍到我靚靚，其實我幾醜樣都係靚，哈哈！」談到為內地節目《最強大腦》擔任嘉賓，對於有傳酬勞一千萬，她回應：「冇咁多，夠買手上隻錶啦，（酬勞吸引你去？）酬勞係吸引嘅，同時節目性質都吸引。」問到回港會否約男友馮德倫？她謂：「會約朋友食飯，同埋返嚟睇貓。（你哋依家咩關係？）好好朋友。（啲貓係咪佢照顧？）點都要人睇住，（啲貓係咪黐佢多啲？）唔怪得依家冇咁黐我啦！」暗示馮德倫經常照料其愛貓。
Luke Evans Profile
Luke Evans現年35歲，2010年於電影《人‧神‧魔戰》飾演阿波羅（Apollo）令他在荷里活走紅。代表作包括《哈比人：荒谷魔龍》和《狂野時速6》等。私生活方面，他曾經公開承認自己是一名同性戀者。
文：名人組