駱胤樺人細膽大 唔驚跟蹤狂
出道一年的「雙妹嘜」SiS樂印姊妹早前在頒獎禮成績斐然，但謙虛的她們稱只是「成功咗一小步」！談到入行後的變化，姊姊駱胤樺大爆曾被狂迷跟蹤歸家，但外形嬌滴滴的她原來非常大膽，竟然嘗試反跟蹤！
由姊姊駱胤樺和妹妹駱胤鳴組成的SiS樂印姊妹去年闖樂壇，成績優秀的她們在早前的《叱咤樂壇流行榜頒獎典禮》揮低大熱鄭俊弘，獲得「叱咤樂壇生力軍金獎」，兩人笑謂當時上台緊張到忘了多謝媽媽：「返到屋企同媽咪講攞咗獎，佢都好開心！終於知道我哋呢一年做緊乜。」談到她們發表得獎感受時表示很難借衣服，胤鳴表示：「因為我哋唔係咁多人識，同埋我哋係『哈比人』身形，又行可愛路線，所以好少啱我哋嘅衫，希望攞到獎之後大家可以踴躍借衫畀我哋。」
雨傘當武器
問到入行後可曾試過想放棄？胤樺表示：「做新人唔辛苦，好多人覺得我讀完大學點解要做歌手？但我哋屋企唔係好有錢，所以冇嘢可以lose，最多賺唔到錢。」胤鳴亦謂：「我用咗五年時間終於行到去做歌手呢步。（依家算成功？）成功咗一小步，我哋仲有好大進步空間。」那麼入行後生活可有變化？較早入行的胤鳴則大爆姊姊曾試過被男狂迷跟蹤回家！人細膽大的胤樺稱：「我記得嗰日係黑雨，佢跟住我返屋企，但我冇報警，因為我撇甩咗佢。嗰陣自己一個幾驚，好彩我攞住雨傘，可以當武器，我仲反跟蹤佢添，等佢知我知道佢嘅存在！」
胤鳴大把貨
談到工作大計，SiS樂印姊妹希望可擁有一首代表作，又想跟杜德偉、天堂鳥等歌手合作。胤樺還想挑戰拍劇，曾拍劇的胤鳴則笑言：「最好拍劇之餘唱埋主題曲！」新一年可想找男友？25歲的胤樺笑言：「呢個係每日嘅願望，年年都想搵個好歸宿，踏入新一年更加想。」較外向的胤鳴就稱不心急拍拖：「我好多森林，可以慢慢揀棵樹！」