克勤聲援阿倫還飛債

為紀念樂壇校長譚詠麟入行40年,有電台邀阿倫和逾40藝人齊錄廣播劇《銀河歲月》,當中包括鄭裕玲(嘟姐)、李克勤及林珊珊等,期間勾起大家不少回憶,嘟姐說:「阿倫係natural high,有場戲好正經,但佢突然爆肚搞笑,畀佢激死,估唔到佢錄廣播劇都好掂,不過都係唱歌好啲!」

克勤則形容校長像其老爸,多年來一直照顧他,克勤自爆今次合作另有所圖:「希望錄完阿倫有演唱會飛畀我,因為我欠好多飛債!」重操故業的珊珊笑言為校長重出江湖,阿倫笑言珊珊初入電台時還以為她是童工。