生命鬥士頑抗病魔
司馬燕患病後一直堅強面對，圈中不少曾患癌的藝人如林淑敏、鄧達智和鄺佐輝等均擁有頑強鬥志對抗病魔，他們讚司馬燕堅強之餘，也分享積極面對癌症的一面。另一抗癌勇士薛芷倫也在微博悼念司馬燕：「多謝你帶給我們正面堅強的生命信念，你將永遠美麗活在我們的心中。」
鄧達智
鄧達智：「我患有乙結腸癌，爸爸、媽咪同兩個家姐都係癌病走嘅，經歷過佢哋病，我已經好有經驗，尤其係當我發現病嗰陣，我媽媽已經走咗，我唔使掛心佢，所以我當時好放心，做完療程仲繼續做嘢同去旅行。如果不幸有病，一定要樂觀面對，有好多時唔係病死，係嚇死，同埋要趁早做身體檢查！」
羅家英
04年曾患肝癌的羅家英：「我唔識司馬燕，但佢好犀利，一個女人抗癌之路唔容易，我都想叫佢家人睇開啲，呢種解脫痛苦未嘗唔係好事。肝癌喺最初發現時醫治，唔復發就冇事，但上年生多咗個腫瘤，切除咗依家好彩冇大變化，抗癌鬥志要好大，做多啲運動、食得均衡，冇好嘅身體冇辦法抵抗。」
鄺佐輝
早前患腸癌的鄺佐輝：「我同司馬燕合作過《K-100》，已經好多年冇見過佢，但自己啲朋友係佢好朋友，所以有問過佢嘅情況，佢嘅離開大家都好難過，佢絕對係好媽媽、好太太，已經完成咗一個好好嘅人生，希望佢屋企人唔好太難過。我今日都入咗院進行第五次化療，依家戒口戒得好清，以蔬菜為主，雞肉、牛肉同煎炸食物一律唔食。」