如楠放閃光彈：永遠屬於你！
無綫藝人蕭正楠（Edwin）、黃翠如昨日宣傳新劇，遭一眾演員將戀情擺上枱，「一對新人」獲大家送「祝福」，又「被練習」合巹交杯，儼如預演婚禮。Edwin自爆穿上女友送的波鞋，更大唱冧歌向翠如表白：「我永遠屬於你！」
蕭正楠（Edwin）和黃翠如昨日出席新劇《師奶Madam》活動，被一眾演員曹永廉（阿廉）、黃智雯、趙永洪等擺上枱，安德尊先以「一對新人」介紹出場，隨後被趙永洪追問何時結婚？Edwin尷尬笑謂：「結咗婚啦……喺戲入面！」大會又安排演員們合巹交杯，惟翠如翹手後怕醜拒飲果汁，此時阿廉打趣道：「你哋都要練定先！」趙永洪又祝他們「百年好合，永結同心」，「如楠」猶如預演婚禮！
記者笑指兩人sweet到痺，翠如即笑道：「唔係，我哋好憎大家……喺戲入面。」她又否認該劇是定情之作，Edwin也稱兩人拍畢此劇才由朋友「升呢」戀人，並謂未有錫住女友拍打戲：「佢骨杉杉，打完仲痛過佢。依家好啲，佢肥咗3磅，我就肥30磅，成日帶佢去食好多嘢，但佢都唔吸收。」有傳該劇因兩人緋聞而延後播出，Edwin解釋：「幾時播係公司安排，但情人節前播都係個好timing。」
黃智雯色誘阿廉
兩人又盼情人節一起於工作中度過，問準備甚麼禮物給女友？Edwin笑道：「呢首歌囉，叫《I Always Be Yours》，即係我永遠屬於你嘅，咁有意義仲唔收貨？」翠如即大讚唱得好，大放閃光彈。大合照時，自爆穿上女友所贈波鞋的Edwin，本來打算踎在前排，卻突然搞笑大叫：「對鞋唔屈得o架，係禮物嚟o架！」
跟阿廉飾演夫婦的黃智雯，透露會穿上性感睡衣色誘「不舉」老公，是否比《飛虎II》着bra一幕更性感？她說：「呢個勁啲，我會着吊帶喱士跳舞誘惑阿廉。（拍攝時尷尬？）我見阿廉有少少手震、出晒手汗。」智雯又戥「如楠」開心，但自言不會刻意公開戀情。
文：影視組