王子涵堅晶女郎

公司結業轉戰內地

我上年下決心入娛樂圈發展，雖然經理人公司突然冇咗，但我都會繼續發展我嘅事業，依家我有臨時經理人處理工作！爹哋（王晶）知道我冇咗公司，佢都只係叫我下次揀公司要小心，都有介紹啲公司畀我，不過依家十個有九個出嚟都係靠自己，就算一個老闆想個仔女繼承生意，都要仔女自己有能力，真係有實質成果先會得到認同。

怕狗餓親努力搵銀

你問我怕唔怕真係喺娛樂圈做唔出成績？每當想放棄嗰陣，我就會諗起我隻狗仔，我唔努力做嘢佢就冇飯食。而我有搞自己生意，做網店賣衫，入吓韓國嘢，想慢慢做到賣埋生活家品，至少到時真係做唔到，都有門生意打理吓。

王子涵表情多多，賣萌都掂！

子涵（左）多年前曾客串電影《七擒七縱七色狼》。

擇偶條件孝順有型

每當想起愛犬，子涵就會打消退出娛圈念頭。	子涵參加內地節目《我不是明星》，邀得王晶與她一起跳舞。	遇到好機會，子涵絕不會放棄。
王子涵盡全力把握每個機會，希望在娛圈有所作為。	子涵喜歡孝順男士，衣着亦要有品味。

現階段我都係努力工作，唔會諗拍拖，依家我單身，鍾意有才華同孝順嘅男仔，衣着唔好太差，我唔鍾意有啲男仔自以為着得好有型，真係好抗拒，而且我身邊多數都係好好朋友嘅異性，都係兄弟，過唔到電。30歲後先結婚我覺得差唔多，要搵一個鍾意嘅人都唔易，除非我真係遇到一個超級好嘅人，我先會考慮早啲結婚，而且爹哋都唔心急，冇壓力。我份人唔鍾意冇嘢做，就算結咗婚，我都會繼續自己嘅事業，唔會唔做嘢。

自力更生拒靠父蔭

我唔鍾意人哋話我靠父蔭，我無靠佢，好多機會都係我自己努力而得到，唔好抹殺我嘅努力，爹哋一路都好錫我，細個都有去客串過佢拍嘅戲，試吓拍戲感覺。依家我同佢都約法三章，佢會公私分明，唔係話唔畀機會我，而係有啱嘅角色會搵我去試鏡。我身為佢個女，點都會有壓力，不過如果我有份拍佢嘅戲應該都好開心，我聽啲演員講，佢哋去深井拍戲就有燒鵝食，嗰區有咩出名嘅嘢食，劇組就會有得食，搞到我好期待佢搵我拍戲。講真，以一個演員嚟講，佢搵任何一個女仔做一個小角色都已經會好珍惜啦。

後記：

以為王子涵嬌生慣養？完全錯晒，影相當日Da Wong一早到場，又幫手睇位，其實之前同Da Wong合作過，喺沙灘無懼強烈太陽及被蚊叮的環境下換上多套比堅尼擺出多個甫士，笑容完全迷到攝影哥哥，瞓地、爬樹、賣萌永無say no，兩小時的拍攝Da Wong都毫無怨言，這份可愛及堅持或者只有Da Wong先有，難怪她直言：「公司雖然冇咗，但係唔會影響我喺呢行繼續發展。」

口述：王子涵

筆錄：李詠林

攝影：秦健輝、鄭家俊

髮型：Samuel Ng@La Mod

太陽眼鏡：Project Eyewear

場地：又一城