唐詩詠笑鄭嘉穎攬女三分醒
無綫藝人唐詩詠、黃德斌及蔡思貝等前晚出席劇集《當鐵馬遇上戰車》煞科BBQ宴，詩詠對鄭嘉穎被最新一期《好報》拍得在夜場喪攬巨咪女，她說：「我恭喜咗佢啦，喺個group度。（佢點回你？）佢話：『你玩嘢呀？』佢都應該識吓女仔啦，睇吓有冇得發展，佢都好耐冇拍拖。（佢Dry咗好耐？）咪係！單身男士識女仔好小嘢啫，冇問題，係唔好彩被影到。（戥嘉穎醉咗睇唔真女仔個樣唔抵？）酒醉三分醒，佢一定認得呀！」
蔡思貝參加10K未練跑
她又為被網友抨擊的旅遊節目主持杜如風講好話：「我有安慰佢，我熟悉嘅佢，並冇外界睇到嗰啲問題，佢從來唔掉嘢，有一千對鞋唔出奇，而且佢自力更生，鍾意fashion又會去研究裏面嘅歷史，係好值得欣賞！」
黃德斌透露踩單車赴會，他說：「我由窩打老道踩過嚟，二十分鐘，好快！（之前同張耀揚踩單車相喺微博被公開？）張相唔係我放，邊個得閒咪邊個踩，我哋遊山玩水啫！」蔡思貝則說：「我想參加十公里長跑，唔知趕唔趕得切練？我又報咗黃秋生教嘅演戲班，好貴！但佢好嚴謹，所以唔理價錢都想聽吓！」
文：影視組