軒仔勢壓謝安琪做樂壇獎王

樂壇最後一張成績表《2014年度勁歌金曲頒獎禮》將於本月18日假將軍澳電視城舉行，雖然無綫揚言開放平台給各大唱片公司旗下歌手參與，但屬「四大」的環球和華納，另外黃柏高揸Fit的太陽娛樂表明「唔玩」，換言之陳奕迅、吳雨霏、周柏豪、連詩雅、許志安及薛凱琪等人無緣攞獎，由天后容祖兒、張敬軒、謝安琪（Kay）及一眾「星夢娛樂」歌手齊心撐起頒獎禮。

唔敢話坐定粒六

總結過去三個頒獎禮的獎項累積，近日憑《青春常駐》在三大頒獎禮狂擸9.5獎的軒仔最多獎，緊接是僅半個獎之差的Kay，由於多間唱片公司的歌手在《勁歌金曲頒獎禮》止步，暫得Kay能威脅到他，據知，軒仔在對手不多下於最後一個頒獎禮上至少擸三大獎，包括金曲獎及首奪「最受歡迎男歌星」等，縱然Kay同時奪三獎，但仍以半個獎之差敗給表姨甥軒仔，令軒仔大有機會以12.5個獎稱霸2014年度樂壇。

謝安琪希望在無綫頒獎禮再有好成績。

各大獎項走勢

軒仔前晚在《十大中文金曲頒獎音樂會》中以四大獎成大贏家，他坦言2014是豐收年，舞台劇及新專輯均有好口碑，他說：「好開心，喺2015年開咗個頭，不過都有壓力，所以今年要努力做好功課。」對於大有機會首嘗「獎王」，身在內地的軒仔昨日在電話說：「唔可以話坐定粒六，已經有五年冇參加無綫頒獎禮（因之前他屬環球歌手），電視台唔係老馮畀獎你，加上係投票，觀眾取態唔同，依家已經好開心。」

左起：吳若希、許廷鏗、何哲圖與鄭俊弘齊齊慶功。

頒獎禮後一眾歌手齊齊捧獎影大合照。

預告請同事慶功

軒仔似乎已做好在《勁歌》狂掃獎的準備，他說：「公司話如果我喺無綫頒獎禮有好成績，會取消我嘅假期，激死。（矛盾？）今年正式做全職歌手，會揀工作先，相信公司有人情味。」軒仔表示如封「獎王」會請公司同事食大餐慶功，他說：「攞獎唔係一個人功勞，英皇同事都辛苦，最開心係英皇言出必行，當年簽約大哥（英皇高層吳雨）同我講會各方面全力配合，只要我肯做就得。」

在前晚頒獎禮奪三獎的Kay解釋扶咪Stand獻唱：「綵排時大會知道我對鞋嘅設計向前彎，加上第一次着唔慣，所以安排個禮儀先生扶我上台同準備個咪Stand。」自嘲生得矮的Kay笑言穿上近8吋高踭鞋是「新高點」，講到因嘔缺席「叱咤頒獎禮」慶功宴，Kay坦言當晚手腳冰凍，她解釋：「所以未完騷就走咗。（公司話你去補妝？）都係，每個人都有自己原因。」

採訪：音樂組