李思捷冧招 蚊蚊有初戀 feel
萬綺雯（蚊蚊）及李思捷首次合作即成為好友，兩人在劇中由歡喜冤家發展成戀人，中間經歷了不少驚濤駭浪，蚊蚊笑言過程Sweet爆，令她重拾初戀感覺，思捷則大讚蚊蚊少女味十足，勝過不少後生女！
無綫藝員萬綺雯及李思捷在劇集《八卦神探》中齊齊飾演警探，蚊蚊以犯罪心理學查案，思捷卻倚靠術數，方法矛盾，兩人由歡喜冤家發展成戀人，現實生活中他們首次合作即非常合拍，無懼緋聞繼續Friend過打Band！
善良妹低能仔
思捷及蚊蚊在訪問期間互笠高帽，思捷大讚蚊蚊超善良，凡事會先為人設想：「佢心地好好，咩都諗人先，有時買嘢畀大家食，原來啲嘢佢自己唔食得嘅，好窩心！（覺得蚊蚊仲有少女味？）有！佢係細路女，我當佢小妹妹，感覺佢細過好多真係廿歲嘅女仔！」蚊蚊亦大讚思捷搞笑又有才華，並非外間認為的「Chok爆」：「佢唔Cool呀！扮型之嘛！可能係對要防範嘅人有個保護罩，其實佢只不過係低能仔，好玩得亦好照顧人，令成個劇組都投入，而且我好欣賞佢錫屋企人。」
蚊蚊表示兩人在劇中的感情線有很多阻滯，令她重拾初戀感覺：「有好多Sweet位，思捷會帶我溜冰，佢又專登去我樓下氹我，我哋一齊睇日落，感覺真係似初戀！」對於拍咀戲，思捷盛讚蚊蚊夠專業，反而自己較緊張，蚊蚊說：「如果我多意見又扭擰，個男仔仲慘，所以盡量一take過拍完。」
同圓兒時夢想
思捷與蚊蚊齊聲表示自小已想當警察，今次可謂一圓兒時夢想，思捷笑說：「拍咁多年戲都想做警察，所以好興奮，好享受做幹探嘅感覺，希望繼續有得做，呢次有幾場打戲，打得好開心，我本身都有玩開泰拳嘅。」蚊蚊說：「我細個想做警察，中學就想做空姐，但最終入咗娛樂圈，今次演警察算係圓夢！（多打戲？）唔多，上次拍劇整裂三條肋骨，盡可能都唔想打o架喇！」
文：立影
萬綺雯髮型：Dominic Tao（Pi4.com.hk）
化妝：Lu
服裝：alexander.t.zhao、club monaco