張智霖甩毛賣萌 靚靚淚鬥淚
「Cool魔」張智霖與太太袁詠儀（靚靚）在真人騷節目《一路上有你》中，與田亮與葉一茜、赫子銘與何潔夫婦齊齊遊韓國，日前節目公開了主題曲MV，邊跳邊唱的Chilam與靚靚顯得非常投入，赫子銘與何潔情到濃時更不忘咀嘴。
力證夠玩得
MV中收錄了不少劇集片段，Chilam與赫子銘相繼以搞笑造型亮相，問到是否為酬勞而犧牲？Chilam笑言是以行動表示自己亦是玩得之人。三對愛侶更大玩特效化妝，雙雙化身可愛老人，又相繼哭成淚人。問Chilam是否搞喊靚靚？他透露：「我喊得仲勁過佢！呢個係其中一個環節，見到佢個妝我都估唔到會係咁樣。劇組仲安排我哋講一句話畀三十年後嘅對方。（講咗乜嘢搞喊靚靚？）大家想知就要留意１月10日首播喇！」
遊韓開眼界
提到節目在韓國取景，從未到過韓國的Chilam大讚比想像中好玩：「真係大開眼界，最重要係可以同太太拍住拖去。」他透露劇組安排眾人與金喜善夫婦見面，交流中韓夫妻相處的分別。韓國天團Super Junior成員金希澈與韓國偶像組合EXO成員黃子韜亦有現身助陣，希澈盡顯花美男本色，好動的黃子韜亦不忘大耍好武功。
文：影視組