唐詩詠自爆洪永城短訊傳情

唐詩詠昨日為好友杜如風主持的旅遊節目記者會撐場,更揚言想捉對方去尼泊爾體驗冇水冇電的日子!自爆緋聞男友洪永城未有送新年禮物的唐詩詠,就直言得短訊祝賀,認真陰功!而杜如風就直言想破Dry,本地、異地通殺:「築地都得!」

藝人唐詩詠昨日在尖沙咀出席無綫節目《流行首爾》記者會,為主持人兼好友杜如風撐場,現場亦有徐濠縈和鄭融等好友支持。問為何缺席除夕倒數活動?唐詩詠坦言趕拍無綫新劇《當鐵馬遇上戰車》故無法出騷搵銀。至於緋聞男友洪永城有否向她說新年快樂?她坦言對方有傳短訊祝賀,卻沒有收到禮物:「唔使啦,一個Message就OK。」

談到資深配音員林保全離世,唐詩詠指最後一次見到對方是上年11月的「無綫長期服務暨傑出員工頒獎禮晚宴」:「影咗張相,因為叮噹把聲由細陪住我大。我睇到App講都諗點解咁突然。」而身為杜如風好友兼旅伴的唐詩詠表示想帶杜如風到尼泊爾靈修:「我去過一個森林,夜晚係冇電,冇熱水沖涼,好原始,想帶佢感受吓。」

杜如風盼異地戀

至於杜如風就透露在首爾拍攝期間患重感冒,要出動輪椅、擔架和救護車送她到當地急症室,休息一日後繼續拍攝。問是否冷親?她直言當時是夏天:「但我要着冬天衫!」問未有過異地情緣的杜如風會否想試一下?她笑謂:「我有情緣就得,咩地都得,築地都得!」記者叫在旁的徐濠縈介紹男仔給杜如風,她就笑謂對方要求高,想男友樣貌才華兼具:「好難並存o架,我都搵唔到啦!」

文:影視組