李彩華拒為三卡鑽破色戒
單身小富婆李彩華（Rain）接受今期《好報》專訪，自爆近兩年成為教徒決意「守貞」，堅拒進行婚前性行為，因此嚇走不少急色男。她透露曾有追求者出動三卡鑽戒，利誘Rain破色戒，但「聖女Rain」企硬Say No，並講明盡量避免跟異性獨處以免蝕底。
現年31歲的女星李彩華有樣有身材，但依然獨守空房未有男友，她接受今期《好報》專訪剖白原因。她自爆兩年前受洗成為基督徒，自此堅守教條拒絕婚前性行為，期間雖有至少半打追求者，不乏型男及富二代，但眾急色男全部不能守色戒，結果最多三個月貨仔便頂唔順打退堂鼓！
追求者即失蹤
Rain昨日補充表示無悔決定，會繼續「守貞」直至遇到真命天子，更表示有追求者利誘她破戒，當中一名「有米男」趁Rain生日出動三卡鑽戒以表誠意，希望率先落訂令Rain放心，並暗示想與Rain「進一步發展」，但她仍不為所動：「個男仔各樣條件都幾好，但唔係有隻戒指就可以咁，戒指我自己都買到！最失望係我拒絕佢後，佢竟然收番隻戒指，仲人間蒸發，大家冇再聯絡，我覺得兩個人真心相愛，唔一定要發生性行為，好似祖藍同李亞男咁，但的確好多追求者接受唔到！」
利誘冇用，問到可有追求者「硬來」？Rain直言不會與異性孤男寡女共處一室，以免有所損失：「啲男仔食完飯後，都會邀請我上佢屋企，話聽吓歌飲吓嘢，我唔知係咪一定有事發生，但費事引人犯罪，同畀自己考驗啦。」
愛心湯保身形
入行15年，Rain一直保持S形身材，只是現時更添成熟韻味，她透露保養方法是每日飲母親炮製的花膠鮑魚靚湯。問可有信心作突破性的裸露演出？她說：「我唔介意性感，主要睇劇情，但始終覺得外國有呢啲戲好正常，嚟到中國人社會好易變咗色情，我心目中嘅性感女神都係荷里活女星，史嘉娜祖漢遜、安祖蓮娜祖莉同安妮希芙威，佢哋舉手投足都好性感。」
場地： FARRINGTON INTERIORS
化妝：Reghan
髮型：Daniel Chou
文：影視組