林夏薇膝腫盆骨傷 死頂開工

無綫女藝員林夏薇最近與楊怡、張繼聰及楊明等拍攝劇集《逆戰塘西》，前晚她在電視城開工時不慎跌倒受傷，整個人撻在地上，傷及盆骨及右膝。意外發生後，現場人員急急上前扶起她，至昨晨夏薇的膝蓋位腫起一大片及感疼痛，她即往求醫及照X光，幸好沒有傷及筋骨。

楊怡擔心內傷

昨日夏薇接受電話訪問，表示醫生建議她要休息一段時間，但她堅持死頂開工，昨晚亦返公司拍攝跳舞戲：「我仲行到路，而呢場跳舞戲我唔係主要跳舞嗰個，希望唔好影響到。（休息吓？）醫生知我仲要開工都好驚訝，但個景係最後一日，我唔想影響到人，點都要頂硬上，醫生開咗啲止痛藥同藥膏畀我。」

林夏薇早前為《逆戰塘西》試造型。（資料圖片）

樂瞳指拍攝現場地面有時濕滑。

前晚是目擊證人之一的楊怡昨日出席宣傳活動，她表示大家見到夏薇受傷都大為緊張，她說：「驚佢真係撞到內傷，見到佢盆骨整親，好擔心，女仔呢度受傷好麻煩，希望佢冇事！（驚影響拍攝進度？）佢咁硬淨，唔怕嘅，就算係休息都應該。」另對於男友羅仲謙片酬三級跳，楊怡坦言不太清楚：「最緊要係佢賺得多，我有叫佢買樓保值。（係咪拉近結婚時間？）冇聽過有咁嘅計劃，你聽佢講啦，買樓都係畀自己私人投資，係阿媽教我買樓，所以我咪教佢囉。」

樂瞳指地濕滑

曾跟夏薇合作的樂瞳昨日對夏薇的傷勢大為擔心，並表示自己未試過拍劇受傷：「拍攝現場有時幾多機關，地面又濕滑，可能我下盤夠穩，所以冇事，夏薇就身子較單薄又唔夠休息，希望佢快啲好番。」

而劇集監製方駿釗昨日現身電視城，他表示有致電夏薇慰問，相信其傷勢不太嚴重：「知道佢行路有啲痛，文戲係OK，如果有大動作嘅嘢會盡量安排替身。（佢有冇要求停工？）佢好專業，堅持開工拍埋佢，套劇要拍到一月底。」

文：影視組