江美儀蝦碌救人幫祥仔除褲
阮兆祥、江美儀日前拍攝一場剝褲戲，祥仔被美儀除剩條孖煙囪，場面搞笑，而之前拍攝受腰傷的祥仔笑言如拍動作愛情片般，每次外景都有武指現身，美儀又笑言：「監製當咗我係楊紫瓊呀！」
無綫藝人阮兆祥、江美儀早前在油麻地為新劇《性在有情》拍攝外景，當中祥仔冒住嚴寒獻身跌入水桶，美儀一心去救祥仔，卻不慎脫掉對方長褲，只剩下孖煙囪示人。七情上面的美儀於試戲時大叫謂：「我同你托大腳呀阮兆祥！」不過美儀亦好好心，不時提醒工作人員顧住祥仔條腰，原來祥仔之前因拍攝其他戲份導致腰傷，祥仔更謂：「有舊骨凸咗出嚟，已經去咗搵神醫『啪骨』喇！後生仔冇咩事嘅！」
似拍「動作愛情片」
雖然劇集以性做題材，祥仔卻大爆戲中有大量追逐和爆破場面，他說：「我都唔知點解次次拍外景都有武指，好似『動作愛情片』咁！」更講笑話次次真身上陣：「係今次有記者探班，監製（文偉鴻）先搵替身畀我！」搞到文偉鴻即時反駁：「你聽佢講？」而江美儀亦不能幸免，焗住化身成動作女星：「監製當咗我係楊紫瓊呀！」談到劇中有不少親熱戲，祥仔就直言為此而大感煩惱：「我同美儀男友（吳君如胞弟吳君祥）仲熟過美儀，搞到拍親熱戲時好似拎咗人哋心愛嘅古董玩。」發現美儀「怒睥」後，祥仔就即時修正「古董」做「洋娃娃」，令對方哭笑不得。
文：影視組