梁政珏胸壓冧男友
無綫咪神梁政珏與牛乳大王男友何思源雖然拍拖只有年多，早前梁政珏公開自爆婚訊，揚言有機會趕及做馬年新娘。正忙於籌備婚事的梁政珏，日前與男友於中環恩愛出巡，物色名貴鑽飾作大婚之用。
當日下午5時許，梁政珏先獨自現身該處商場閒逛，逢店必入，但沒有「未婚夫」相伴的她，顯得無厘心機，於名店逛了一圈便步出，再轉場到仿鑽珠寶店物色心頭好。期間見她左睇右睇，又不時甜笑傾電話，未幾果然見何思源前來會合，甫見男友梁政珏即時生猛晒。當她揀選了大大粒仿鑽戒指時，即問男友意見，逗留約1小時才離開。梁政珏全程翹住男友行，又不時胸壓男友手臂，冧到男友笑吟吟，其後他們又往揀選髮飾，未幾便有斬獲。