Eddie從低做起 冰室變小廚
唱跳組合EO2出道的彭迪安（Eddie），最近因「撻沙哥」爆紅，原來他主理的冰室又有新搞作，今次開多間小廚！拍劇又出位，生意愈做愈大，與女友朱慧敏的感情又穩定，可謂「瓣瓣掂」，都算是收到最好的聖誕禮物啦！
Eddie參演電視劇《使徒行者》演「撻沙哥」而爆紅，他坦言：「多咗人認得。其實每個角色對我都好重要，但估唔到撻沙哥只係出現七集半就有咁大迴響，多謝監製畀機會我！」Eddie笑言不怕次次做奸角：「做奸有好多方法，好似大傻哥（成奎安）咁，佢唔係一個惡人，但又做到惡人！我都想試吓做老師，為人師表，其實所有角色都係新挑戰，冇話特別限死，有得發揮先最緊要。」
最正糯米雞翼
由藝人到搞生意，Eddie分享如何從低做起：「第一間華星冰室喺灣仔開，EO2嗰時仲忙緊，到筲箕灣分店我先參與，開始學洗碗、收銀、掃地。最初好大壓力，每晚都有百幾樣新嘢入我個腦，直到依家三年幾。成個團隊冇分你我，呢個係我好熱愛呢個團隊嘅原因！」
對由冰室轉型做小廚，Eddie話考慮已久：「有時想請人食飯都要搵個地方，唔通話落嚟飲杯茶食件蛋撻咩？巧合遇到我哋個大廚Eric，傾咗年幾兩年，不停搵舖。呢個新組合未試過，有小廚又有冰室仲有賣包點，如果成功磨合到，所有嘢都唔係問題！」招牌菜方面，Eddie笑言未試勻全部菜式：「推薦糯米釀雞翼，同埋杏汁豬肺湯。個雞翼我都試過親自起骨，嗰下好有滿足感！」
送早餐當浪漫
Eddie亦不忙多謝女友朱慧敏：「佢畀好多佢家人嘅經驗我，而且佢好細心，好多細節都係佢幫我跟！」又指與女友過一個普通聖誕就足夠：「會買吓聖誕卡親手寫畀朋友，呢個世代打開信箱，都係收到月結單，收到聖誕卡會好驚喜！」不過Eddie就未係時候拉埋天窗：「自己都鍾意小朋友，不過開新舖，想穩定啲先。」Eddie自言無情趣：「我諗最冧試過喺佢未瞓醒，送早餐畀佢。我自己覺得浪漫咋，唔知佢會唔會話凍晒，哈哈！」
文：專案組
攝：劉斌
場地：華星客棧