周秀娜為買半山 寄住小西灣

已榮升內衣品牌老闆娘的女神周秀娜(娜姐),密密接騷拍戲繼續唔停手,昨日凌晨娜姐難得夜蒲鬆一鬆,飲飽食醉後返小西灣居屋大覺瞓,令住處成謎的她親自將住址曝光!惟她解釋只是寄居親友家,並自爆想買中半山靚樓,豪擲八位數做業主!

即將在明年踏入「女人三十」的性感女神周秀娜,早前豪擲八位數建立自己的內衣品牌「LaaNaa」,升呢成為老闆娘,更定下5年內成功上市的計劃!不過做老闆娘的壓力甚大,昨日凌晨娜姐選擇與數名女友人去蘭桂坊夜蒲,實行放鬆兼減壓!

速食快餐醫肚

昨日凌晨2時許,見平日接載娜姐出入的七人車途經中環擺花街,當駛至雲咸街時,突然有一名醉漢向七人車踢了一腳,司機即時落車理論,期間發生爭執及推撞,引來路人圍觀。不過司機趕着去接娜姐,踢車一事最後不了了之。其後就見夜蒲完的娜姐連同兩名女助手在路邊等上車,可能天寒地凍為免「咪咪」着涼,娜姐穿上密實厚冷衫,而下身穿上短皮褲及長靴,露出白滑大髀晒長腿。

可能天氣寒冷要食多餐保暖,當座駕直駛到附近快餐店時,女助手落車為娜姐買快餐醫肚。在車上速食快餐的娜姐,最後竟在小西灣的居屋富怡花園落車,令一向住處成謎的她住址曝光!眼見有記者影相,她坦言去完party,飲了幾杯酒,她說:「其實我冇地方去啦,面好紅呀我。(飲咗好多?)食飯嗰陣飲咗少少酒。」其後雙頰紅卜卜的她揮手向記者道別,與女助手齊齊上樓。

擲八位數圓夢

昨日本報記者致電娜姐,問到她住址揭盅一事,她即否認說:「我唔係住嗰度,因為唔想畀記者知我住邊,所以路經親戚屋企就上去住一晚。」另外,近日有地產消息指娜姐頻頻在中半山一帶睇靚樓,儲落不少老本的她更準備豪擲八位數入巿,娜姐承認此事,並謂正在盤算買樓大計:「投資當然要小心謹慎,要計劃點去投資,睇咗啲單位,新樓太細唔夠住,夠大嘅單位,樓齡又太舊,其實我想要間屋夠住,又有一望無際嘅靚景,要再睇多啲慢慢揀。」

而已經考獲車牌的娜姐仍未買愛車代步,原來她最想有樓又有車,兼租埋車位泊車,實行所有願望要一次過達成!

文:專案組 

攝:追蹤組

第一手消息請下載on.cc東網iPhone/iPad/Android/Windows Phone Apps