岑潔儀佗B瞞老公偷食

岑潔儀兩年前在峇里大搞浪漫婚禮，嫁個好老公的她，婚後甚少工作，是名副其實幸福少奶奶，Zoey一直享受二人世界，怎料四月時發現有喜，殺她一個措手不及，她說：「從來冇諗過自己會做媽咪，知道嗰陣喺日本，我仲有飲酒同玩刺激嘅活動。」

開心到爆喊

懷孕期間難免需要戒口，Zoey就試過因吃不到心頭好而大哭，又試過因吃到美食而落淚，非常搞笑，她謂：「佗咗兩個月嗰陣喺歐洲，同老公去食Burger，但咁啱係間餐廳嘅落場時間冇得食，我唔開心到喊，淚流滿面，喊到崩潰，我話我好想食Burger呀！我老公都話我使唔使咁誇張！」她續說：「我好鍾意食辣嘢，但老公唔畀我食，因為驚對BB皮膚唔好，但我趁老公出埠，偷偷哋去咗食雞煲，我一食，係感動到流眼淚喊呀，因為太耐冇食喇！」

岑潔儀笑言自己怕痛，會選擇開刀生B。	現佗B七個月的岑潔儀，曾因為食而趁老公出埠，瞞住對方去食雞煲！	準媽媽岑潔儀直言因大肚，性格變得容易滿足。

預產期下月

平時急性的Zoey佗B後，變得容易滿足，為了胎教她更狂煲古典音樂，她直言對BB將來的教育和照顧有信心：「預產期喺出年一月，到時老公會陪我入產房，我會開刀，因為我怕痛呀！」

攝：嚴偉國

場地：金域假日酒店Osteria意大利餐廳

Makeup：Hazi Leung

Hair：Ron Ng@HH salon

文：專案組