C AllStar爆斷背情 King聖誕黐On仔
聖誕佳節將至，C AllStar率先品嘗應節甜品預早過甜蜜蜜聖誕，不過四子的感情狀況一直是個問號，成員King與On仔驚爆常被誤會是斷背一族，King更笑指可與對方過聖誕，幸好最近與五位女神Super Girls合作，索性趁機「採陰補陽」，洗走「HeHe」味！
組合C AllStar日前率先到酒店為聖誕系列甜品試味，四子品嘗扭紋黑松露蛋糕後，大讚好味兼有層次。當中無甜不歡的On仔自爆曾下廚整甜品示愛，可惜失敗收場：「自己都試過整心太軟畀鍾意嘅人，最後兩樣都失敗咗，因為一撻個心太軟出嚟嗰吓，就已經成pat嘢咁，Timing唔啱。」
釗峰安排拖手位
C AllStar預告今年聖誕計劃落區報佳音，更會設點唱環節，與粉絲歡度佳節。不過出道以來，四子一直鮮有談及感情狀況，問到今年聖誕是否單身過「Lonely Christmas」？King開玩笑自爆：「啲人成日話我同On仔係兩公婆，自從我哋喺紅館公開拖手後，就自動搭配咗，做咩都可以搭埋一齊。」而「媒人」釗峰表示當時「世紀拖手」是出自他的鬼主意：「排練時我目擊嗰刻，覺得佢哋爭咁啲嘢，我就提議不如拖住呀，再揈吓啦。」
孖SG「採陰補陽」
四子最近與Super Girls合作新歌《Super Star》，King笑言被五位女神電到魂魄唔齊，Jase即時抽水笑說：「你最鍾意On仔，嗰啲女仔會動搖到你咩？冇可能！」King反擊說：「佢哋暫時未動搖到我嘅，不過同佢哋合作，多咗啲陰氣，個人冇咁黐on仔啲，平衡番少少。」
場地：紅磡都會海逸酒店
文：音樂組