與香香奉旨床戰 羅仲謙嘆冇料到
羅仲謙與岑麗香最近再於劇集演情侶，雖然監製安排床上戲，但阿謙卻嫌棄尺度保守，兩人只對望一會，連厚疊疊的戲服也毋須脫，鏡頭一轉更是衣衫整齊，謙仔更搞笑說：「點諗到咁保守先！」
羅仲謙與岑麗香繼《On Call 36小時II》合演情侶後，最近於新劇《醋娘子》再度結緣，同聲指上次香香因病離世，以致兩人未能開花結果，今次終能在古裝劇再演情侶。阿謙大讚鬼妹仔香香勤力，每日也背熟劇本才入廠，促使自己要加倍努力，免得失禮人前。
談到於劇中與香香有床上戲，阿謙沒好氣謂：「係有呀！未成親已經洞房，聽落好似好正，其實係大家對望一陣，啲戲服咁多層，一層都冇除到，醒番之後仲繼續係着得靚靚，冇亂過o架！點諗到古代人喺床上都咁保守先。」在旁的香香對於劇中不時要照顧「少爺」阿謙，坦言現實生活中不太願意：「除非對象係我好愛嘅人，好似為屋企人洗衫同煮飯我都可以o架！」
獲杏兒鼓勵：好warm
首度演古裝的香香與視后胡杏兒不乏對手戲，開拍前更鼓起勇氣傳短訊給杏兒「打底」，她謂：「我話自己中文唔好，會好多NG，辛苦佢，希望佢畀耐性我，點知佢覆番我，仲鼓勵叫我加油添！我覺得好warm，好多謝佢，仲有成套劇嘅演員都幫我好多，令我冇咁大壓力。」
採訪：影視組
攝影：劉智源
場地：Cafe Yawn
髮型：Jan Chiu@IL Colpo
化妝：Leo Tam@Annie G Chan
服裝：Avenue 1218