楊秀惠捱冷 胸誘陳豪

楊秀惠、胡定欣及陳豪昨日到屯門為無綫新劇《鬼同你OT》拍外景，劇情講述她先後以低胸勁露三吋事業線白裙及性感泳衣Look色誘陳豪，因而招來暗戀陳豪的定欣妒忌。昨日天氣徘徊20度，因拍攝場地位處小山上，氣溫變相再低幾度，身形弗爆的秀惠怕冷坦言「死頂」：「場戲交代我有好多追求者，我為咗演嘢，就特登晒泳衣Look，所以件泳衣都幾性感，我好怕冷親，拍攝前一晚開始，我已經飲咗好多薑茶打定底，為咗保暖都會食多啲嘢！（唔怕現肚腩仔？）唔怕得咁多，保暖最緊要！」

享盡艷福

秀惠被問性感示人的感覺，她說：「其實呢場泳裝戲係有需要嘅，因為呢場戲之後，會講我同陳豪之間有好多好黑色幽默嘅搞笑劇情，泳衣Look只係成個劇其中一環，往後仲有好多好戲，要我哋諗吓點樣做，有好多地方畀我哋發揮！」

楊秀惠捉實陳豪的手，搞到他硬晒軚。	胡定欣於劇中暗戀陳豪，情節搞笑。	楊秀惠捱冷以泳裝上陣，笑言飲定薑茶打底。

定欣則踢爆陳豪劇中艷福不淺，她說：「我暗戀陳豪，但佢唔知，所以今日呢場戲，我好妒忌秀惠好身材。我到後來做咗鬼，只有田蕊妮見到我，我就上阿田身，同陳豪kiss，所以陳豪要同阿田又要同我拍kiss，都幾人鬼情未了o架！」

陳豪則笑言心有所屬，他說：「拍呢個劇幾好玩，等埋位都會諗起個仔（Aiden），惟有盡量唔去諗，否則好分神。（諗點同個仔扮靚？）哈哈，我哋真係好鍾意同Aiden扮靚，Aiden都好開心，雖然未知聖誕使唔使開劇，但盡量會為個仔搞聖誕party，對佢成長係個重要回憶。（扮聖誕老人氹仔？）可以考慮吓喎！」

文：影視組