袁詠儀趙薇 影后濕平緣慳
兩大影后趙薇及袁詠儀（靚靚）前日不約而同現身銅鑼灣為子女置裝，趙薇表現風騷，戴上黑超於各店穿梭，更為囡囡揀了兩對波鞋及不少靚衫，及後她步入一童裝店，碰巧袁詠儀正在內揀衫，不過靚靚未有為意，轉身即走，令兩影后緣慳一面。表現避忌的靚靚甫見記者拍照，即戴眼鏡遮掩素顏兼低頭避鏡。
前日下午銅鑼灣出現兩大影后趙薇和袁詠儀（靚靚），兩位靚媽忙為子女置裝，下午3時半趙薇在多名助手陪同下現身商場，一身便服打扮的她戴上黑超邊行邊揀，拿着色彩鮮艷的波鞋仔睇不停，黃色鍾意，紅色又靚，結果兩對買晒，之後再往童裝店揀裙仔，她笑容滿面看不停，似是已幻想到女兒穿上新裝的可愛樣子。
趙薇為女兒挑選大堆新衫，睇怕小四月由聖誕到新年都着唔晒，期間有Fans上前邀合照，她亦來者不拒。趙薇步入另一店舖時，影后靚靚亦正巧在內為寶貝仔揀衫，戴上眼鏡的她睇得相當專心，不過可能唔啱心水，不足一分鐘即轉身走人，與趙薇緣慳一面。靚靚離開時發現記者拍照，即避忌低頭急腳走。
萌爆小四月
趙薇心繫寶貝女小四月，晚上忍不住上載女兒新照並說：「good night！」向女兒道晚安，小四月一雙大大眼睛似足媽媽，被網民大讚漂亮，更說趙薇要變成「國民岳母」。
文、攝：追蹤組