朱晨麗秘密加操 儆惡懲奸
選美出身的朱晨麗在無綫新劇《八卦神探》中，以一頭清爽短髮轉型做打女，演出令人眼前一亮。為演活劇中賊匪聞風喪膽的女警角色，開拍前不惜由武師為她單對單加操，雖然練到手瘀腳瘀，她毫無怨言，希望打女形象獲觀眾喜愛。
2011年港姐冠軍朱晨麗（朱朱），在新劇《八卦神探》中形象大變，剪短髮轉型做打女，獲監製張乾文高度評價為「拳擊高手」，朱朱說：「我之前演《名媛望族》、《衝上雲霄II》，角色都係感情起伏大，今次演個除咗打功夫外乜都唔識嘅單純女仔，只一心一意捉賊，好開心可以作多方面嘗試。」
拳來腳往好有型
對打拳、功夫有興趣的朱朱，竟然愛上拍打戲：「劇情講我可以單手捉住身形比我高大嘅賊，監製喺開拍前，搵咗個武師單對單同我加操，等我演起嚟更加有說服力，雖然我練到手瘀腳瘀，拍打拳重、踢沙包少不免會整傷整痛，但我跳開舞都習慣咗，我都幾鍾意拍打戲，感覺好有型！（想轉行做打女？）做演員要乜都試，如果得到觀眾認同，我都想拍多啲打戲！」
蔡思貝表現獲讚
朱朱的鍛煉成果，從工作人員對她的馬甲線讚不絕口得到印證，她說：「我拍嘅時候冇為意自己幾多磅、瘦咗幾多，但工作人員就話見到我啲腹肌，話我有馬甲線，我冇刻意要練，亦唔知算唔算成績好突出，留番畀觀眾評價！」今次長髮剪短改造型，從未試過剪短頭髮的她沒有不捨得，她說：「試咗先啦！出嚟效果大家都鍾意，都幾開心。」
同樣選美出身的蔡思貝，監製張乾文亦讚表現不俗：「思貝第一次拍劇，開拍頭幾日有少少怯，始終拍劇同選港姐、做司儀唔同，我哋糾正咗佢一啲缺點，好快佢就入到狀態，新人嚟講NG算少，表現幾好，幾多分就等觀眾評！」
文：影視組