朱咪咪預告晒60歲事業線
藝人朱咪咪將於明年二月假紅館舉行兩場個人演唱會，昨天在記者招待會上，快將步入花甲之年的咪咪姐透露演唱會將大騷「六十歲的事業線」，屆時更會披上婚紗！此外，她又出口術謂希望邀得汪阿姐和徐小鳳來睇騷。
藝人朱咪咪昨天為明年二月六日的紅館「朱咪咪我做晒演唱會—香港站」舉行記者招待會，席間更宣布加開七號合共兩場。密實打扮的咪咪姐翹住合作單位老闆一同進場，十足上演婚禮。記招上咪咪姐不時大講笑話，更透露演唱會歌衫性感，司儀余宜發追問會否露事業線？穿上拉鏈長外套的咪咪姐笑言：「今日條事業線（拉鏈）已經由喉嚨椗落到膝頭哥。」記招上咪咪姐又謂演唱會有一部分是關於婚宴，其後自爆當年結婚很崎嶇：「我結婚嗰晚擺完酒要即刻走去夜總會唱歌，呢個新娘真係好苦命！」余宜發續問洞房崎嶇嗎？咪咪姐即笑說：「洞房好順利，唔崎嶇。」
邀請神秘嘉賓
受訪時咪咪姐透露整個演唱會都是自己構思，之後還會到內地、加拿大、新加坡等地舉行演唱會。問到會邀請哪些嘉賓？她則保持神秘不肯透露太多：「因為想吸引年輕人，所以搵咗隊香港組合，同埋搵阿姐（汪明荃）介紹咗個粵劇界嘅人。」咪咪姐又謂本想邀請阿姐做嘉賓，但不敢開口。她亦表示阿姐和徐小鳳都是她很尊敬的前輩。問到可會邀請兩人睇騷？咪咪姐謙稱：「唔敢呀，都想。（我哋幫你講。）如果佢哋肯嚟梗好。」快將六十歲的咪咪姐亦透露屆時會穿性感歌衫騷事業線，而結婚環節時更會穿上婚紗。
開錯刀通波仔
另外，咪咪姐又大呻上年當黑：「2013年係好衰嘅一年。」計有媽媽和弟弟先後離世，再有患冠心病的她本未嚴重到要做手術，但被診錯病情而要無辜開刀「通波仔」，其後買舖又被呃，蝕了一百多萬元，認真慘情。
文：音樂組