何佩瑜冧招 住家菜箍仔
外形潮爆的何佩瑜（Jeana）原來亦有溫柔細心一面，自認宅女的她近期經常躲在家中鑽研廚藝，煮餸宴客冇難度之餘，更精通炮製老火靚湯，冇拖拍的她卻深信可以用靚湯箍緊自己的男人，之前亦試過炮製燭光晚餐再加悉心打扮，冧招盡出為愛情營造浪漫氣氛！
擁34C、24、33驕人身材的Jeana廚技同樣「惹火」，祖籍北京的她有空會搓麵粉，秘製餃子懷念一下家鄉風味，又愛親自下廚大宴親朋，近日更埋首鑽研老火湯妙法，希望練得一手「神級廚藝」，她說﹕「學緊煲花膠、鮮奶燉雞咁啦，發覺好食材先係最緊要。雖然依家單身，但相信老火靚湯真係可以箍住男人個胃同心。我平日食得好健康，有時拍戲收得早，會去行超市買嘢整沙律，最鍾意食藍莓，伴飲白酒仲good。」
炮製燭光晚餐
以往沉溺於愛情時，Jeana試過花盡心思氹對方高興：「想同佢燭光晚餐撐枱腳，入廚房忙完一輪，因為唔想有陣油煙味，搞掂即刻衝入洗手間由頭洗到落腳，趁佢返嚟之前dress up同化好妝，播住音樂享受二人世界……」在感情世界內，她亦曾遇過出軌的另一半，不過Jeana表示現階段非常享受單身生活，談到對未來的憧憬，也離不開「食」：「好想衝出香港，有機會去外國體驗生活，即使只係喺海邊嘅小餐廳做侍應都唔錯。」
接受老外男友
自認性格洋化的她，形容在香港生活，感覺似螞蟻：「去到外國就如同飛鳥，可能香港嘅壓迫感唔係太啱我。（接受到另一半係老外？）OK呀，我中學讀band one，簡單英語對答難唔到我，哈哈！其實以往都試過同外國人拍拖，對方大我好多，喺銀行做高職，大家喺蘭桂坊識嘅，不過可能因為當時我得19歲未ready，慢慢就無疾而終。」
最近因為緬懷偶像張國榮（哥哥）關係，Jeana更找朋友教授電子琴，閒時重奏哥哥金曲回味經典旋律，更拍下片段上載到社交網站分享。性感而感性的Jeana，其實多才又多藝！
攝影：劉斌
內衣：Blossom
場地：Loft23
文：影視組