李亞男開P作「煮」 祖藍呻窮冇禮
王祖藍上周成功向李亞男求婚，前晚又為女友大搞驚喜派對，與一眾好友苟芸慧、朱璇及宋熙年等，在大埔愛巢慶祝亞男30歲牛一，亞男更下廚與父母一起炮製正宗上海菜。早前送上超過三卡鑽戒給女友的祖藍則抵死呻窮：「冇錢買生日禮物啦！」
藝人王祖藍上周三於無綫台慶，當眾向女友李亞男下跪求婚後，浪漫驚喜一浪接一浪，趁女友昨日（25日）30歲生辰，祖藍前晚叫齊一班好姊妹，在兩人剛遷入的大埔新居，為亞男大搞生日驚喜派對！眾姊妹苟芸慧（苟姑娘）、朱璇、鄺文珣、宋熙年及陳智燊（Jason）等，陸續於晚上八時許駕車抵達，並向一對準新人送上祝福，猶如為「藍男」預演婚禮，幸福滿瀉！
學煲愛心湯水
已獲贈超過三卡巨鑽訂婚戒的亞男，被問到男友送甚麼生日禮物？她甜笑道：「佢求婚都送咗粒好大嘅戒指畀我，已經好開心。（想收到咩禮物？）唔需要任何嘢，我應該學Linda（鍾嘉欣）搞慈善派對，叫啲朋友捐款去慈善機構，但今次冇醒起同佢哋講唔好買嘢。」並謂男友貼心地買蛋糕，為她籌備整個生日派對，又透露當晚與一班好友燒烤，其父母則負責炮製正宗上海菜，自言會在旁幫手的亞男說：「我都想學煮幾味簡單菜式，好似煲湯、煮個麵，我煮意大利粉都唔錯，最想學煮日本豬骨拉麵。」
友賀早生貴子
有傳明年「2.14」情人節在迪士尼擺婚宴，亞男故作神秘說：「我哋遲多少少就會話畀大家知，依家要籌備吓。（年頭？）都快o架喇，所以好快會公布。」祖藍則笑言冇錢再送禮物，他說：「今晚朋友嚟晒乜禮物都有。（比巨鑽更貴嘅禮物？）冇錢喇！祝佢開開心心，所有籌備順順利利。」
兜錯路而遲大到的苟姑娘、朱璇和楊卓娜，紛紛笑稱祝亞男早生貴子，苟姑娘更謂：「我幫佢湊仔！」情侶檔現身的宋熙年和Jason則說：「佢哋已經好sweet，祝佢哋幸福快樂啦！（送乜禮物？）攞支酒嚟咋，遲啲補番。」眾人又與壽星女切蛋糕，玩至凌晨才逐一離去。
文：影視組