黃芷晴X陳嘉桓 哎吔姊妹花
黃日華女兒黃芷晴及武打女星陳嘉桓（Rose）性格一冷一熱，但早前兩人拍攝電影卻出奇地合拍，火速成為好友。Rose自爆曾與華哥合作，戲外獲華哥當女兒般看待，兩人大讚這位「真假爹哋」表面火爆內裏溫柔。Rose與芷晴又笑談兒時志願，芷晴驚爆曾想做清道夫，Rose則想嫁巴士司機，相當搞笑！
重低音族 互提Chok聲
陳：陳嘉桓 黃：黃芷晴
Rose與芷晴因合作拍戲而成為好友，除興趣相近外，更自爆同是低音一族，講對白太投入時會真情流露鬥低音，要互相提點Chok聲！
陳：好耐之前我已經Follow你Instagram，一早係網絡朋友！到舊年合作拍電影《販賣愛》，我哋飾演一對好朋友，經歷好多嘢，拍完變咗真朋友。原來我哋有好多嘢都幾相似，例如把聲都係咁低沉，講對白太投入會「打回原形」變到好沉，溫柔嘅說話都變到好粗魯咁，好得意。
黃：實在太沉喇。可能我哋見到同類喇，一見就變咗用重低音傾偈，平時同其他人講嘢都唔覺。
陳：我哋要不停提大家，唔好咁低音，要Chok高音啲！有場戲講你畀男友打到瘀晒，我嚟鬧醒你，拍到半夜，把聲都拆晒添！
黃：呢次係我第一次拍戲，之前拍過電視劇，但完全唔同，你幫咗我好多！我比較慢熱，你就開朗啲，會幫我同啲劇組混熟，所以如果要我數你優點都係呢樣，好易同人打成一片。我有時太怕醜，會畀人誤會我冇禮貌。仲有我想搵你學功夫，你幾時開班呀？
陳：哈哈，我冇開o架喎，我都好欣賞你，因為我有畫畫或DIY手作，但你嘅心機係多我好多。
黃：咁不如你教我詠春，我教你畫畫。
笑談一個爸 火爆住家男
Rose年前與芷晴父親黃日華合作拍戲，笑言對方當她女兒一樣。兩女大談對「真假父親」看法，踢爆華哥外表火爆，但其實是細心住家男。
陳：其實我同你爹哋華哥（黃日華）合作過，仲去雲南開工。佢雖然唔係演我爸爸，但戲外真係好似爸爸咁照顧我。記得有次佢同我講：「遲啲我個女會入行，我依家照顧你當練習。」我都會叫佢華爸爸，之後識咗芷晴，個感覺好特別！
黃：你覺得我爸爸點？
陳：外間可能覺得華哥好火爆，我喺片場見過佢呢種性格，絕對係幫到工作，控制到混亂嘅場面，但對住我時，好似真係對住個女咁，完全唔惡！
黃：係呀，佢表面好火爆，尤其踢波嗰時，你搶咗佢個波佢會發茅，但返到屋企好細心，好照顧媽咪同我，會變咗個小男人咁。
陳：我都見過佢放狗，好住家男人feel。
黃：哈哈，佢會買日用品，打理花園，好似園丁咁！
陳：我細細個已睇華哥嘅劇，最深刻係《射鵰英雄傳》入面嘅靖哥哥。
黃：我都有睇爹哋嘅戲，最深刻係佢演《天龍八部》嘅喬峰。記得有次同佢睇電視，咁啱播番舊版《天龍八部》，佢就演和尚虛竹，佢仲話自己個樣幾搞笑！
陳：華哥會講好多以前拍劇嘅經驗我聽。佢話如果我哋唔教，你哋後輩點會知？
黃：我入行後第一次拍劇都係同爸爸演，佢教我耳聽八方，同埋點演得好啲。
陳：佢同我講話以前啲人唔會拎劇本去現場，一早熟晒。
黃：係呀！所以佢唔鍾意飛紙仔，覺得唔係咁好。
少女豆芽夢 誓嫁巴士佬
所謂少女情懷總是詩，芷晴與Rose兩位少女坐埋一齊，自然要傾吓兒時志願。兩人自爆曾想做清道夫及嫁巴士司機，認真出人意表！兩女大談擇偶條件之餘，又為對方選配。
陳：細個睇得多《妙手仁心》，作文我的志願寫醫生。寫咗好幾年，之後就不停轉，想做空姐、畫家，到大個咗開始標高，覺得自己幾適合做Model。近年拍廣告扮過空姐，喺亞洲各大機場都見到我，都叫圓咗心願。
黃：我就好搞笑，細個話想做清道夫，嚇到媽咪話我黐線。我當時覺得清道夫好偉大嘛！之後想做老師，大啲想做舞台劇演員，讀咗設計就想做啲同設計有關嘅工作。
陳：我細個想過嫁畀巴士司機，因為可以免費搭巴士，係咪好搞笑？
黃：哈哈，其實我覺得你啱啲有肌肉又超高大的男仔，190cm啦，成道門咁高。
陳：大家認為我襯啲高嘅。我就覺得幾難搵，因為我仲高緊。其實男矮過女都唔一定唔襯嘅，好似甄子丹同汪詩詩，感覺幾好吖！
黃：最緊要心地好。
陳：係，同埋我鍾意運動型，笑容靚嘅男仔。
黃：咁你覺得我襯咩男仔？
陳：你皮膚好白，感覺襯韓國男仔，青靚白淨，斯文啲。
黃：都係，我比較慢熱，好怕男仔太活躍，搞到我唔知點咁。
後記
Rose及芷晴表面性格截然不同，Rose熱情多言，芷晴慢熱怕醜，但原來嗜好相近，更同樣有「特別的拍攝技巧」，對拍攝的角度及準備工夫相當講究。Rose笑言：「我哋會Post埋差唔多嘅相，例如去野餐要拎好多嘢去影相，杯碟茶壺要襯晒一Set，同朋友都要襯晒Dress Code。」芷晴亦笑說：「冇錯，就算拎好多嘢都唔介意，最緊要靚，塊枱布都要靚！」
筆錄：立影
攝影：張福宏
場地：Loft23
服裝：Lilybrownhk
黃芷晴化妝及髮型：Cobia